भांगरभूंय | प्रतिनिधी
ऑनलायन पद्दतीन 2 ऑक्टोबर 2022 मेरेन चलतली मोहीम
भांगरभूंय, सिद्धार्थ कांबळे
पणजी : जीआय टॅग (जिऑग्राफीकल इंडिकेशन) मेळिल्ल्या गोंयांतली काजू फेणी, खोलाचीं आनी हरमलचीं मिरसांग तशेंच गोवन खाजें ह्या तीन वस्तूंक भारतांतल्याे सर्वोत्तम वस्तू म्हूण सिद्ध करपाक गोंयकार लोकांच्या मतांची गरज लागतली. पेटंट, डिझायन आनी ट्रेड मार्क्सचे नियंत्रक जनरल (सीजीपीडीटीएम) हे संस्थेन मतदाना खातीर मोहीम सुरू केल्या. 2 ऑक्टोबर 2022 मेरेन ऑनलायन पद्दतीन ही मोहीम चालू आसतली.
जीआय टॅग मेळिल्ल्या वस्तूंत सर्वोत्तम वस्तू खंयच्यो हाचो सोद घेवपा खातीर दिल्लींतल्या ‘सीजीपीडीएम’ हांणी फाटल्या कांय दिसां पसून ऑनलायन पद्दतीन ही मोहीम सुरू केल्या. मोहिमे खाला जीआय टॅग मेळिल्ल्या वस्तूंचे अॅग्रीकल्चर, फूड स्टफ, हँडिक्राफ्ट, मॅन्यूफॅक्चर्ड
आनी नॅचरल अशा पांच गटांत वर्गीकरण केलां. गटा प्रमाण देशभरांतल्या जीआय टॅग वस्तूंची वळेरी तयार केल्या. ताचेर 2 ऑक्टोबर मेरेन मतदान जाले उपरांत ज्या वस्तूंक सगल्यांत चड मतां मेळटलीं तांकां देशांतलीं वर्सोत्तम वस्तू म्हूण घोशीत करतले.
अँग्रीकल्चरांत गोंयांतली खोलाचीं आनी हरमलचीं मिरसांग ह्या दोन वस्तूंचो आस्पाव केला. मॅन्यूफॅक्चरांत काजू फेणी आनी फूड स्टफांत गोवन खाज्याचो आस्पाव आसा. गोंयांतल्या ह्या वस्तूंक देशांतल्या सर्वोत्तम वस्तूंचो मान मेळोवन दिवपाक गोंय विज्ञान आनी तंत्रज्ञान मंडळान यत्न चलयल्यात. फुडल्या दोन म्हयन्यांत हे विशीं राज्यभर जागृताय करतले.
मजगतीं, आतां मेरेन गोंयांतली काजू फेणी, खोलाचीं आनी हरमलचीं मिरसांग, मयंडोळी केळी आनी गोवन खाजें ह्या वस्तूंक जीआय टॅग मेळ्ळां.
आतां विज्ञान आनी तंत्रज्ञान मंडळान मानकुराद आंबो, गोवन बेबिंका, ताळगांवची वांयगी, कोकोनेट फेणी, सात शिरांची भेंडी आनी कुणबी साडी ह्या वस्तूंचीय जीआय टॅग खातीर चैन्नयचें संस्थे कडेन शिफारस केल्या. तशेंच ते विशींची प्रक्रिया पुराय केल्या.
चडांत चड गोंयकारांनी मतदान करचें
काजू फेणी, हरमलचीं आनी खोलाचीं मिरसांग तशेंच गोवन खाजें ह्या गोंयांतल्या वस्तूंक फक्त देशांतच न्हय, जाल्यार विदेशांतूय नामनां मेळ्ळ्या. गोंयांत दर वर्सा येवपी देशी-विदेशी पर्यटक ह्या वस्तूंच्या खरेदीक प्राधान्य दितात. ताका लागून ह्या गोंयकार वस्तूंक देशांतल्याे सर्वोत्तम वस्तू म्हूण नामनां दिवपाक सगल्याच गोंयकारांनी हे मोहिमेंत वांटेकार जावन मतदान करचें, अशें आवाहन विज्ञान-तंत्रज्ञान मंडळाचे प्रकल्प वैज्ञानीक दीपक परब हांणी केलां.
ऑनलायन मतदान कशें करप?
पयलीं https://ipindiaservices.gov.in/girpoll हे वेबसायटीचेर वच्चे.
थंय आपलो आपलाे ई-मेल आयडी, नांव आनी मोबायल नंबर तशेंच पांच गटांत वर्गीकरण केल्ल्या सगल्या ‘जीआय टॅग’ वस्तूंची वळेरी दिल्या.
दरेक गटांतल्या आपणाक जाय त्या वस्तूक मत दिवचें पडटलें. एका गटांत फक्त एकाच वस्तूक मत दिवपाक मेळटलें.
दरेक गटांतल्या आपणाक जाय त्या वस्तूंक मतदान केले उपरातं ‘सबमीट’ करचे पडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
