भांगरभूंय | प्रतिनिधी
म्हापशें ः कांदोळे, सेबेस्तियनवाडोच्या पॅरी जनरल स्टोरांत शॉर्ट सर्किटाक लागून आनी दोन गॅस सिलिंडराच्या स्फोटांत उजो लागलो. हे घडणुकेंत दोग जाण किरकोळ जखमी जाल्यात. तशेंच सुमार 5 लाखा परस चड लुकसाण जालां.
लॉरेन्स परेरा (68) आनी इस्बिन परेरा (62) अशी जखमा जाल्ल्या जोडप्याची नांवां. शुक्रारा दनपारां सुमार 11.52 वरांचेर ही दुर्घटना घडली. दुकानांतल्या वीज उपकरणांक अचकीत शॉर्ट सर्किट जावन उजो लागलो. उजो पालोवपाचो यत्न करतना जाण्टे परेरा जोडपें जखमी जाले. उजो पातळ्ळें बरोबर लोकांनी जाण्ट्या जोडप्याक भायर काडले. ते उपरांत दुकानांतले दोन गॅस सिलिंडराचो स्फोट जावन पुराय दुकानाक उजो लागलो.
हे घडणुकेची म्हायती मेळटकूच पिर्ळण उजो पालोवपी दळान पर्वरी उजो पालोवपी दळाच्या सहकार्यान उजो पालयलो. दुकानांतले तीन फ्रिज, हेर सगळ्यो वस्तू आनी दुकानाच्या फाटल्यान उबी आशिल्ली डिओ स्कुटर उज्यात लासली. ह्या अपघातांत सुमार 5 लाखां परस चड लुकसाण जाल्ल्याचो उजो पालोवपी दळ आनी पुलिसांनी अदमास काडला.
मजगतीं, जखमी जाण्टे जोडप्याचेर कांदोळेच्या हॉस्पिटलांत उपचार करून घरा धाडले. पिळर्ण उजो पालोवपी दळाचे उपअधिकारी सनी फायदे, शिल पाटील, भावेश शिरोडकार, राजेश पिरणकार, ऋषिकेश कुबडे, परेश गावस, तशेंच पर्वरी उजो पालोवपी दळाचे प्रशात सावंत आनी तांच्या वांगड्यांनी उजो नियंत्रणांत हाडून तो पालयलो. कळंगुटे पुलीस निरिक्षक अनंत गांवकार आनी ताच्या वांगड्यांनी पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
