भांगरभूंय | प्रतिनिधी
भांगरभूंय । प्रतिनिधी
म्हापशेंः कांदोळेच्या दर्या देग वाठारांतली हॉटेलां आनी रिसॉर्टाच्या बांदकामाचो पर्यावरणाचेर कितलो परिणाम जाता हाची मोलावणी करपी अभ्यास करपाची मागणी करपी थाराव आयतारा जाल्ले कांदोळे पंचायतीचे ग्रामसभेंत पास केलो. ह्या वेळर सरपंच फॅर्मिनो फर्नांडीस आनी पंच वांगडी हाजीर आशिल्ले.
नवी हॉटेलां आनी रिसॉर्टांच्या बांदकामाचो परिणाम पंचायत वाठारांतल्या उदक आनी वीज पुरवण, शेतां आनी लोकांचेर जातलो देखून पर्यावरणीय अहवाल तयार करपाची गरज आसा, अशें रोशन मथियास हांणी सांगलें. गोंय जमीन उदरगत नेमा प्रमाण पांच वर्सांत ऑक्युपन्सी सर्टिफिकेट दिल्ल्या सगल्या नव्या बांदकामाचे ऑडिट करपा खातीर पंचायतीन एक समिती स्थापन करपाचो निर्णय घेतला. नेमा प्रमाण ह्या बांदकामांत पार्किंगाची सुवात आसा काय ना, हें पळोवपाचें आनी नेमांक पाळो दिनात जाल्यार कारवाय करपाचो अधिकार पंचायत मंडळाक आसा अशें तांणे सांगलें.
दिवाळेच्या दिसांत कांदोळे येरादारीची कोंयडी जाल्ल्यान ग्रामस्थांनी येरादारी वेवस्थापनाचेर लक्ष दिवपाक पंचायत मंडळाक सांगलें. आवाजा प्रदूशण, दर्या देगे वयले बेकायदेशीर मसाज पार्लर आनी दलाल हांचे आड कारवाय करपाक लोकांनी पंचायतीक सांगलां. कांदोळे ऑन शोर कॅसिनो बंद करपाचो थाराव ग्रामसभेंत पास केलो. हे विशीं कॅसिनोच्या धनयाक पत्र धाडटले अशी म्हायती सरपंच फर्नांडीस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
