भांगरभूंय | प्रतिनिधी
मुख्यमंत्रीः मायनींग, मोपा उपरांत आतां म्हादय जिखपाचें सरकाराचें उद्दिश्ट
2006 ते 2012 ह्या काळांत घुंवडायलां उदक
गोंयच्या काँग्रेस सरकारान हरकत घेतली ना
पणजी : गोंयांत काँग्रेस सरकाराच्या काळांत कर्नाटकांत म्हादयचें उदक घुंवडायलां. 2006 ते 2012 ह्या काळांत काँग्रेसीन सर्वोच्च न्यायालयांत कर्नाटकाचे कृतीक हरकत घेतिल्ली जाल्यार कर्नाटकाक डीपीआर तयार करपाची धिटाय येवची नाशिल्ली असो आरोप मुख्यमंत्री डॉ. प्रमोद सावंत हांणी केलाे. मायनींग, मोपा उपरांत म्हादयची लडाय जिखपाचें सरकाराचें उद्दिश्ट आसा, अशें मुख्यमंत्र्यांनी सांगलें.
म्हादय प्रस्नाचेर जागृताय करपा खातीर काँग्रेस, गोवा फॉरवर्ड, आप पक्षां सयत बिगर राजकी संघटणांनी आयज सांजे सांखळे जाहीर सभेचें आयोजन केलां. हे सभेचे पयलीं मुख्यमंत्री डॉ. प्रमोद सावंत हांणी राज्याचे जनतेक संबोधीत केलें. विरोधी पक्षांक म्हादय प्रस्नाचें पडिल्लें ना, तांकां फक्त राजकारण करपाचें आसा असो आरोप तांणी केलो.
म्हादयचो प्रस्न हो आतांचो न्हय. 1998 सावन म्हादय लढ्या कडेन म्हजो संबंद आसा. 1961 वर्सा गोंयाक स्वातंत्र्य मेळ्ळें. म्हादयचो उगम कर्नाटकांत जाता आनी न्हंयचें 70 टक्के पात्र गोंयांत आसा. 1990 पयलीं म्हादयचेर वीज निर्मिती तशेंच हेर प्रकल्प स्थापन करपाचे प्रस्ताव आशिल्ले. हे विशींचे पत्रवेव्हार सरकारा कडेन उपलब्ध आसात. 1990 उपरांत म्हादयचें उदक घुंवडावन तें मलप्रभा न्हंयेंत सोडपाचें कर्नाटकाचे यत्न सुरू जाले. 2006 ते 2012 ह्या काळांत काँग्रेसीचें सरकार आशिल्लें. ह्या काळांत कर्नाटकान म्हादयचें उदक घुंवडायलां. काँग्रेस सरकारान कर्नाटकाचे कृतीक कसलीच हरकत घेतली ना. तेन्नाच सर्वोच्च न्यायालया कडेन हो मुद्दो उपस्थित करपाची गरज आशिल्ली. कर्नाटकान उदक घुंवडायिल्ल्यान आतां डीपीआर तयार करप कर्नाटकाक शक्य जालें अशें मुख्यमंत्र्यांनी सांगलें.
म्हादयचो प्रस्न राजकी न्हय
कांय पक्षां खातीर म्हादयचो प्रस्न हो राजकी आसा. म्हादय प्रस्ना वेल्यान ते राजकारण करपाक सोदतात. भाजप सरकारा खातीर हो अस्मितायेचो प्रस्न आसा. सैमाचो प्रस्न आसा. म्हादय खातीर जे लोक आतां एकठांय जाल्यात, ते कांय वर्सां पयलीं काँग्रेस सरकाराचो भाग आशिल्ले. कांय जाण काँग्रेस सरकाराचे सल्लागार आशिल्ले. तेन्ना तांणी काँग्रेस सरकाराक योग्य सल्लो दिल्लो जाल्यार ही स्थिती येवची नाशिल्ली. म्हादय प्रस्नाचेर भाजप सरकार गंभीर आसा. मायनिंगेचो प्रस्न 2012 वर्सा सुरू जाल्लो. हो प्रस्न सरकारान सुटावो केला. मोपा विमानतळाक लेगीत विरोध आशिल्लो. मोपा विमानतळ प्रकल्प पुराय जाला. आतां म्हादयचो प्रस्न आसा. मायनींग, मोपा उपरांत सरकार म्हादयची लढाय जिखतलें असो विस्वास म्हाका आसा अशें मुख्यमंत्र्यांनी सांगलें.
2010 वर्सा म्हादय लवादाची स्थापणूक जाली. 2012 सावन लवादा कडल्यान सुनावणी सुरू जाली. 2018 वर्सा लवादान निवाडो दिलो. लवादान कर्नाटक तशेंच महाराष्ट्राक उदक दिलां. फक्त 3.5 टीएमसी उदक घुंवडावपाक लवादान मान्यताय दिल्या. लवादाच्या निवाड्याक गोंय सरकारान सर्वोच्च न्यायालयांत आव्हान दिलां. ह्या काळांत तेन्नाचे मुख्यमंत्री सर्गेस्त मनोहर पर्रीकार हे दुयेंत आशिल्ले. दुयेंसाक लागून लवादाच्या निवाड्याक आव्हान दिवपाक कळाव जावपाची शक्यताय आसा.
म्हादय उदक प्राधिकरण स्थापन करपाची मागणी
म्हादयचेर देखरेख दवरपा खातीर म्हादय उदक वेवस्थापन प्राधिकरण स्थापन करपाची मागणी गोंय सरकारान केंद्रीय गृह मंत्री अमीत शाह हांचे कडेन केल्या. ते भायर कर्नाटकाच्या डीपीआराक दिल्ली मान्यताय फाटीं घेवपाची मागणी आसा. डीपीआराक मान्यताय दिल्ली आसली तरी रानजीव कायद्या खाला अभायरण्य वाठारांतलें उदक घुंवडावपाक मेळना. हरकतींचें पत्रवेव्हार सरकार करतलें अशें मुख्यमंत्री डॉ. प्रमाेद सावंत हांणी सांगलें.
विरोधकांक करपाचें आसा राजकारण
म्हादय खातीर सरकारान सगल्या आमदारांची बसका आपयिल्ली. विरोधी आमदारांक फोन करपा सयत ईमेलाचेर निमंत्रण दिल्लें. विधानभवनांत आसून लेगीत विरोधी आमदार बसकेक आयले नात. नेमा प्रमाण कांय निर्णय मंत्रीमंडळ बसकेंत घेवचे पडटात. शिश्टमंडळ व्हरपाचो निर्णय मंत्रीमंडळ बसकेंत घेतलो. विरोधी पक्ष म्हादय विशीं गंभीर ना म्हणून ते बसकेक हाजीर रावले नात. राजकारण करपा खातीर आयज ते सभा घेतात असो आरोप मुख्यमंत्री डॉ. प्रमोद सावंत हांणी केलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
