भांगरभूंय | प्रतिनिधी
प्रदेश अध्यक्ष अमीत पाटकार बसकेंत जातले वांटेकार
पणजी : काँग्रेस विधीमंडळ गटाचो फुडारी आयज दिल्लीत जावपी बसकेंत थारपाची शक्यताय आसा. विधीमंडळ फुडाऱ्या विशीं आयज बसकेंत चर्चा जातली अशी म्हायती प्रदेश अध्यक्ष अमीत पाटकार हांणी दिली. विधीमंडळ फुडारी पदा खातीर युरी आलेमांव हांच्या नांवाची चर्चा सद्या सुरू आसा.
विधानसभा वेंचणुके उपरांत मायकल लोबो हांची काँग्रेस विधीमंडळ फुडारीपदार निवड जाल्ली. हाका लागून तांची विरोधी पक्ष फुडारी म्हूण नेमणूक जाली. विधानसभा अधिवेशना पयली काँग्रेसीचे आमदार फोडपाचो यत्न जालो. दिगंबर कामत आनी मायकल लोबो ह्या दोगांचाे हातूंत हात आशिल्ल्याचो आरोप प्रभारी दिनेश गुंडू राव हांणी केल्लो. अधिवेशनाच्या पयल्याच दिसा मायकल लोबोक विधीमंडळ फुडारीपदा वेल्यान काडचो अशें पत्र कॉंग्रेसीच्या आमदारांनी सभापतीक दिलें. ते भायर दिगंबर कामत आनी मायकल लोबो हांचे आड काँग्रेसीन अपात्रतायेची याचिका सभापती रमेश तवडकार हांचे कडेन दाखल केली. हे याचिकेचेर अजून निर्णय जावंक ना. दिगंबर कामत आनी मायकल लोबो हांणी पक्ष विरोधी कारवायो केल्ल्यान अपात्रताय याचिका दाखल केल्ल्याचें अध्यक्ष अमीत पाटकार हांणी सांगिल्लें. काँग्रेसींत फूट पाडपाचे घडणुकेक म्हयनो जावन गेलो तरी अजून विधीमंडळ फुडाऱ्या विशीं निर्णय जावंक ना.
हे फाटभुंयेर प्रदेश अध्यक्ष अमीत पाटकार हे काल (आयतारा) दिल्लीक गेल्यात. सोमारा विधीमंडळ फुडाऱ्या विशीं दिल्लींत चर्चा जातली. भारत जोडो यात्रा सुरू जाता. हे फाटभुंयेर सगल्या राज्यांच्या प्रदेश अध्यक्षांक आपयलां. हे खातीर हांव दिल्लींत गेलां अशें अमीत पाटकार हांणी सांगलें. भारत जोडो यात्रेची बसका जाली काय विधीमंडळ फुडाऱ्या विशीं चर्चा जातली अशें तांणी सांगलें.
नेटा डिसोझा यात्रेची समन्वयक
काँग्रेसीची भारत जोडो यात्रा 7 सप्टेंबराक सुरू जातली. नेटा डिसोझा हिची गोंयची समन्वयक म्हूण नेमणूक जाल्या. पुराय देशांत काँग्रेसीची जागृताये खातीर यात्रा जातली. भारत जोडो यात्रेची सविस्तर कार्यावळ आयचे बसकेंत थारतली. गोंया सयत सगल्या राज्यांनी ही यात्रा जातली. दरेक राज्या खातीर समन्वयकाची नेमणूक जाल्या.
आमदार संकल्प आमोणकार हे सध्या विधीमंडळ गटाचे उपफुडारी आसात. काय काँग्रेस आमदारांच्या भाजप प्रवेशाची चर्चा अदीं मदीं जायत आसता. विधीमंडळ फुडाऱ्या खातीर पयली आमदार कार्लोस फरेरा हांच्या नांवाची चर्चा आशिल्ली. आतां युरी आलेमांव हांच्या नांवाची चर्चा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
