भांगरभूंय | प्रतिनिधी
बसके खातीर मुकूल वासनीक येतले गोंयांत
पणजी : काँग्रेस विधिमंडळ फुडारी दिल्लींत न्हय गोंयांतूच थारतलो. विधिमंडळ फुडाऱ्या विशीं आमदारांची बसका घेवन निर्णय घेवपा खातीर सचीव मुकुल वासनीक 11 वा 12 सप्टेंबराक गोंयांत येतले. दिल्लींत जाल्ले बसके उपरांत प्रदेश अध्यक्ष अमीत पाटकार हांणी ही म्हायती दिली.
दिल्लींत सरचिटणीस के. सी. वेणुगोपाल हांचे कडेन विधिमंडळ फुडाऱ्या विशीं चर्चा जाली. बसकेक मुकूल वासनीक हाजीर रावंक नात. ताका लागून निर्णय जालो ना. पूण मुकूल वासनीक 11 वा 12 सप्टेंंबराक गोयांत येतले, अशें प्रदेश अध्यक्ष अमीत पाटकार हांणी सांगलें.
काँग्रेसीची दिल्लींत सोमारा बसका जाली. बसका जाले उपरांत अमीत पाटकार गोंयांत आयले. गोंयांत आयले उपरांत तांणी ही म्हायती दिली.
काँग्रेसची 7 सप्टेंबराच्यान भारत जोडो यात्रा जातली. कन्याकुमारी ते काश्मीर मेरेन पदायात्रा जातली. राहुल गांधी हे पदयात्ंरेत वांटेकार जातले. कन्याकुमारी ते काश्मीर मेरेनच्या मार्गाचेर गोंय ये ना. तरी हे पदयात्रेंत गोंयचे कार्यकर्ते वांटेकार जातले.
विधानसभा अधिवेशना पयलीं काँग्रेसीचे आमदार फोडपाचो यत्न जालो. दिगंबर कामत आनी मायकल लोबो ह्या दोगांचाेय हातूंत हात आशिल्ल्याचो आरोप प्रभारी दिनेश गुंडू राव हांणी केल्लो. अधिवेशनाच्या पयल्याच दिसा मायकल लोबोक विधीमंडळ फुडारीपदा वयल्यान काडचो, अशें पत्र काँग्रेसीच्या आमदारांनी सभापतीक दिलें. ते भायर दिगंबर कामत आनी मायकल लोबो हांचें आड काँग्रेसीन अपात्रतायेची याचिका सभापती रमेश तवडकार हांचे कडेन दाखल केली. हे याचिकेचेर अजून निर्णय जावंक ना. दिगंबर कामत आनी मायकल लोबो हांणी पक्ष विरोधी कारवायो केल्ल्यान अपात्रताय याचिका दाखल केल्ल्याचें अध्यक्ष अमीत पाटकार हांणी सांगिल्लें. काँग्रेसींत फूट पाडपाचे घडणुकेक म्हयनो जावन गेलो तरी अजून विधिमंडळ फुडाऱ्या विशीं निर्णय जावंक ना. अॅड. कार्लोस फरेरा आनी युरी आलेमाव हांच्या नांवांची चर्चा सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
