भांगरभूंय | प्रतिनिधी
नवी मुंबय, खबरां संस्था: काँग्रेसीचे आदले खासदार मिलिंद देवरा हांणी पक्ष वांगडीपदाचो राजीनामो दिल्लो. दक्षीण मुंबय लोकसभा मतदारसंघांतल्यान दोन फावटीं वेंचून आयिल्ले देवरा हांणी मुख्यमंत्री एकनाथ शिंदे हांचे हाजेरींत शिवसेनेंत पक्षप्रवेश केलो. पक्षप्रवेश करचे पयलीं तांणी सिद्धीविनायक देवळांत वचून देवरा हांणी दर्शन आनी आशिर्वाद घेतले.
काँग्रेसीचे आदले खासदार मिलिंद देवरा हांणी पक्ष वांगडी पदाचो राजिनामो दिल्लो. ते शिंदे गटांत वचपाची शक्यताय आसली. मुख्यमंत्री एकनाथ शिंदे हांचें शासकीय घर आशिल्ल्या वर्षा बंगल्यार दनपरां मुख्यमंत्री एकनाथ शिंदे हांचे हाजेरींत देवरा हांणी शिवसेनेंत पक्षप्रवेश घेतिल्ल्याची खबर मुखार आयल्या.
काँग्रेसीचे फुडारी जयराम रमेश हांणी ‘एक्स’ अकावंटचेर एक ट्वीट करून फुडारी सर्गेस्त मुरली देवरा हांचो उगडास केलो. ‘मुरली देवरा हांच्या वांगडा सारिल्ल्या दिसांची म्हाका याद येता. मुरली देवरा हांचे सगळ्या पक्षां इश्ट आशिल्ले. पूण ते सदांच काँग्रेसी फाटल्यान उबे रावले. तथास्तु!’ अशी प्रतिक्रिया जयराम रमेश हांणी मिलिंद देवरांच्या राजीनाम्यार दिली.
देशांतले बरेच विरोधी पक्ष फुडारी भाजपा आनी तांच्या इश्ट पक्षांत वचपाक लागल्यात. तांचे शेंकड्यांनी वावुरपीय वांगडा येवपाक लागल्यात. हाचो भाजपाक व्हड फायदो जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
