भांगरभूंय | प्रतिनिधी
मुख्यमंत्री डॉ. प्रमोद सावंतः संजय शेट्ये हांचो भौसंख्य कार्यकर्त्यां सयत भाजपांत प्रवेश
भांगरभूंय । प्रतिनिधी
दिवचलः 2012 आदीं काँग्रेस पक्षाची निती म्हादय विकपाची आशिल्ली. तांचीं सगळीं सगळीं पापां रोखडींच भायर सरतलीं. विरोधक अर्थ नाशिल्ली टिका करतात. आयज आमी म्हादयच्या रक्षणा खातीर सगळे बाबतींत फुडाकार घेतला. केंद्राचो लेगीत आमकां तेंको आसा. आमी निश्चीत म्हादयची लडाय जिखतले, असो विस्वास मुख्यमंत्री डॉ. प्रमोद सावंत हांणी उक्तायलो.
दिवचलच्या झांट्ये सभाघराचे मेकळे सुवातेंत आयोजीत कार्यावळींत हजारांनी कार्यकर्त्यांचे हाजिरेंत आदले जिल्हो पंचायत वांगडी संजय शेट्ये हांणी आपल्या भौसंख्य कार्यकर्त्यां सयत भाजपांत प्रवेश केलो. ह्या वेळार मुख्यमंत्री डॉ. सावंत उलयताले.
ह्या वेळार माचयेर भाजपा प्रदेशाध्यक्ष सदानंद शेट तानावडे, आदले सभापती राजेश पाटणेंकार, आमदार प्रेमेंद्र शेट, दिवचलचे नगराध्यक्ष कुंदन फळारी, मंडळ अध्यक्ष विश्वास गांवकार, डॉ. शेखर साळकार, तुळशीदास परब, वल्लभ साळकार, डॉ. कौस्तुभ पाटणेंकार, नगरसेवक निलेश टोपले, अनिकेत चणेंकार, रंजना वायंगणकार, दीपा पळ, राजाराम गांवकार, रिजाय बेग, तनुजा गांवकार, ककमलेश तेली, विजयकुमार नाटेकार, शर्मिला पळ, अरुण नायक, विठ्ठल करमरकार, अर्जुन माळगांवकार, संकरिता देसाय, सुबत्ता सामंत, नाझीम शेख, तुळशीदास गांवकार, विवीध गांवचे सरपंच, पंच, कार्यकर्ते हाजीर आशिल्ले.
सगळे गांव स्वयंपूर्ण करप वसो म्हूण आमी आपणायला. ताका दरेकल्यान योगदान दिवचें. भाजपा सरकार दरेका घटकाक उदरगतींत फुडें व्हरचे खातीर डबल इंजीन सर्व शक्ती पणाक लावन वावर करतलें. दिवचल म्हालांत उण्यांत उणे हजारभर लोकांक रोजगार दिवपी प्रकल्प उबारतले. तशेंच नव्यो सरकारी नोकऱ्यो उपलब्ध करपाची प्रक्रिया नव्यान सुरू करतले. संजय शेट्ये आनी ताच्या कार्यकर्त्यांनी व्हड संख्येन भाजपांत प्रवेश करून योग्य निर्णय घेतला, अशें मुख्यमंत्री डॉ. सावंत हांणी सांगलें.
विकासाचे बाबतींत भिवपाची गरज ना. मुळावी उदरगत आनी मानवी उदरगत सादपा खातीर वावर करतात. आयज दिवचले अपेक्षीत उदरगत जावंक ना. हे फुडें उदरगतीची नवी उंचाय मेळोवपा खातीर खूबशे प्रकल्प चालीक लायतले. तशेंच प्रदुशण विरयत उद्देग हाडून रोजगाराक चालना दितना उण्यांत उणे एक हजार लोकांक रोजगार दिवपाचें उदिश्ट आशिल्ल्याचें मुख्यमंत्री डॉ. सावंत हांणी सांगलें.
दिवचले प्रशासकीय प्रकल्प उबारपाचें सपन रोखडेंच पुराय करतले. उजो पालोवपी दळ, कदंब बसस्टॅण्ड पुराय करतले. तशेंच शारा वांगडाच कोयर प्रकल्प बरो आसा. कोणेच रस्त्याचेर कोयर उडोवचो न्हय, असो उलो मुख्यमंत्री डॉ. सावंत हांणी ह्या वेळार मारलो.
रस्त्याचें जाळें विणून अस्नोडें, उसप, पीर्ण ह्या गांवांक मोपा विमानतळा कडेन जोडून ह्या वाठारांतल्यो शाक भाजयांचें उत्पादन थेट विमानतळार पावोवन उदरगतीक व्हड चालना दितले, अशें मुख्यमंत्र्यान सांगलें.
दिवचले भाजपाची ताकद व्हड प्रमाणांत वाडल्या. 2024 चे लोकसभा वेंचणुकेंत भाजपाक दिवचल म्हालांत 80 टक्के मतदान मेळटलें आनी दोनूय जिल्ह्यांनी भाजपा जैतवंत जातलो, असो विस्वास मुख्यमंत्र्यान उक्तायलो.
प्रदेशाध्यक्ष तानावडे हांणी सांगलें, भाजपा देश आनी राज्य पांवड्याचेर व्हड वावर करता. संवसारांत सगळ्यांत व्हड पक्ष आशिल्ल्या भाजपान आयज संवसारांत नांव जोडलां. डबल इंजीन सरकारान उदरगतीक व्हड गती दिल्या. संवसारीक पांवड्याचेर प्रधानमंत्री नरेंद्र मोदी हांकां व्हड मान आसा.
डॉ. सावंत गोंयचें रूपरंग बदलतात. ताका लागून भाजपा हो सर्वमान्य पक्ष आसा. संजय शेट्ये हांणी कार्यकर्त्यां वांगडा भाजपांत प्रवेश करून व्हड वावर केला आनी ताका लागून पक्ष घटमूट जाला, अशें तानावडे हांणी सांगलें. अपक्ष आमदार डॉ. चंद्रकांत शेट्ये हांचो भाजपाक तेंको आसा. दिवचलची उदरगत करतना खूबशे नवे प्रकल्प म्हालांत येवप गरजेचें आसा. ते खातीर भाजपाक व्हड आदार मेळटा. दिवचल म्हाल भाजपामय जाला. म्हादय बाबतींत सरकार ठाम आसा. मुख्यमंत्री आनी सरकार योग्य पद्दतीन फुडें वतात, अशेंय तांणी सांगलें.
प्रधानमंत्री नरेंद्र मोदी, मुख्यमंत्री डॉ. प्रमोद सावंत, प्रदेशाध्यक्ष सदानंद तानावडे हांच्या मार्गदर्शना खाला भाजपाक पुराय आदार करतलों आनी दिवचल मतदारसंघांत पक्षाक नवी शक्त दितलों, अशें संजय शेट्ये हांणी सांगलें. राजेश पाटणेकार हे आपले राजकी गुरू. आयज भाजपांत प्रवेश करतना खूब खोस भोगता, अशेंय तांणी सांगलें.
भाजपान देशांतूच न्हय जाल्यार संवसारीक पांवड्याचेर खाशेली वळख निर्माण केल्या. संजय शेट्ये हांणी भाजपांत प्रवेश करून योग्य निर्णय घेतला, अशें प्रेमेंद्र शेट हांणी सांगलें.
संजय शेट्ये हांचो साडेचार वर्सां आदींच भाजपांत प्रवेश जावपाचो, मात कांय कारणांक लागून तो उरलो. आपूण तीन खेपे ह्या मतदारसंघाचो आमदार जालो. फुडारांत डॉ. चंद्रकांत शेट्ये हे लेगीत भाजपांत येतले. तांणी भाजपाचो बावटो फुडें व्हरचो. लोकसभा वेंचणुकेंत विरोधकांची अनामत रक्कम जप्त करतले, असो विस्वास राजेश पाटणेंकार हांणी उक्तायलो.
ह्या वेळार आदले शिवसेना फुडारी रमेश नायक तशेंच खूबशे सरपंच, पंच, तशेंच भौसंख्य कार्यकर्त्यांक भाजपांत प्रवेश दिलो.
ह्या वेळार कुंदन फळारी हांणी आपले विचार मांडले. विश्वास गांवकार हांणी येवकार दिलो. राजन कडकडे हांणी सुत्रसंचालन केलें जाल्यार अरुण नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
