भांगरभूंय | प्रतिनिधी
ए के हरबोला : वेगवान पांचवे गस्ती बोटीचें जलावतरण
भांगरभूंय । प्रतिनिधी
वास्को : सागरी सुरक्षा, आत्मनिर्भरता, योग्य आनी तत्काळ कारवाय ही भारतीय तटरक्षक दळाची राष्ट्रा खातीर बांदिलकी आसा. भारतीय तटरक्षक दळाची शक्त दिसान दीस वाडटा. कसलेंय आव्हान स्विकारपाक आमी सदांच तयार आसात, अशें भारतीय तटरक्षक दळाच्या अस्तंत दर्या शीम देगेचे तटरक्षक कमांडर अतिरिक्त म्हासंचालक ए के हरबोला हांणी सांगलें.
भारतीय तटरक्षक दळा खातीर गोवा शिपयार्डा वतीन वेगवान 8 गस्ती बोटी बांदता. तातूंतल्या पांचवे बोटीचें सोमारा 16 जूनाक जलावतरण सुवाळो जालो ह्या सुवाळ्या बरबोला उलयताले. ह्या सुवाळ्यांत हरबोला हांची घरकान्न कविता हरबोला हांचे हस्तुकीं ‘अचल’ हे गस्ती बोटीचें जलावतरण केलें. ह्या वेळार गोवा शिपयार्डाचे अध्यक्ष आनी वेवस्थापकीय संचालक ब्रजेश कुमार उपाध्याय, तटरक्षक दळाचे म्हानिरिक्षक सुधीर साहनी, म्हानिरिक्षक भीष्म शर्मा, भारतीय तटरक्षक दळाचे गोंय मुखेली मनोज भाटीया तशेंच गोवा शिपयार्ड, भारतीय तटरक्षक दळाचे हेर वरिश्ठ अधिकारी हाजीर आशिल्ले.
दर्यादेगेची राखण, सोद आनी बचावकार्य, समाज विरोधी घटकां पासून सागरी मालमत्तेचें रक्षण आनी हेर म्हत्वाच्या गजालींनी भारतीय तटरक्षक दळ म्हत्वाची भुमिका वठयता.
‘मेक इन इंडिया’न ‘ऑपरेशन सिंदूर’ वेळार आपली शक्त आनी तांक दाखयल्या. भारतीय तटरक्षक दळ आनी गोवा शिपयार्ड हांचें घट्ट नातें 1988 सावन आसा. गोवा शिपयार्डान आतां मेरेन भारतीय तटरक्षक दळा खातीर 36 बोटी बांदल्यांत, तातूंतल्यो 23 वेगवान गस्ती बोटी आसात. गोवा शिपयार्डान बांदिल्ले दरेके बोटीचें एक खाशेलपण आसा. गोवा शिपयार्डान बांदिल्ल्या संकल्प आनी संग्राम बोटींनी व्हड कामगिरी केल्या. जलावतरणा जाल्ल्या गस्ती बोटीं मदीं 60 टक्क्यां परस अदीक स्वदेशी सामुग्रीचो वापर केला. ह्या बोटींक लागून दर्यादेग संपत्ती, जुंवीं वाठारांची सुरक्षा जावपाक मजत जातली, अशें हरबोला हांणी सांगलें.
हे बोट बांदणी खातीर हरबोला हांणी गोवा शिपयार्ड आनी हेर विवीध उद्देगांच्या यत्नां खातीर कवतूक केलें. आत्मनिर्भरतेचे दिशेन योग्य तरेन पावल उखल्लां, अशें तांणी सांगलें. तशेंच स्वदेशी बोट बांदणींतल्या सर्वोच्च मानकांक सेगीत पाळो दिल्ले खातीर तांणी गोवा शिपयार्डाचें कवतूक केलें. गोवा शिपयार्ड आनी भारतीय तटरक्षक दळाच्या अखंड समन्वयाचो तांणी खास उल्लेख केलो. ब्रजेश कुमार उपाध्याय हांणी येवकार दिलो. तांणी गोवा शिपयार्डाचे कामगिरीचो थोडे भितर नियाळ घेतलो. भारतीय तटरक्षक दळा खातीर बांदतात त्या वेगवान गस्ती बोटी संबंदांत प्रकल्प हो एक प्रतिश्ठा वाडोवपी प्रकल्प आसा अशें तांणी सांगलें.
प्रदुशण नियंत्रण बोट जातली बेगिनूच पुराय
फुडल्या दोन – तीन म्हयन्यांनी प्रदुशण नियंत्रण बोटीचें काम पुराय जातलें. हो बोटीची लांबाय 52 मिटर, रुंदी 8 मिटर तशेंच चडांत चड गती वराक 27 सागरी मैल आसा. पीच प्रोपेलर आदारीत प्रणालीचेर काम करता. तातूंत अत्याधुनीक शीप लिफ्ट सिस्टमीचो उपेग केला. तशेंच हेर कांय अत्याधुनीक खाशेलपणां हे बोटींत आसा, अशें ब्रजेश कुमार उपाध्याय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
