कळसा-भांडुरा काम जातलेंच

भांगरभूंय | प्रतिनिधी

बोम्मईः डीपीआराक कायदेशीर मान्यतायः कसलीच आडखळ ना

भांगरभूंय I प्रतिनिधी
पणजी : कळसा – भांडुरा प्रकल्पाचें काम टप्प्या टप्प्यान पुराय जातलें. केंद्रान प्रकल्प आराखड्याक मान्यताय दिल्ल्यान काम पुराय करपाक कसलीच आडखळ ना, अशें कर्नाटकाचे मुख्यमंत्री बसवराज बोम्मई हांणी म्हणलें. हुबळींत घेतिल्ले पत्रकार परिशदेंत ते पत्रकारां कडेन उलयताले.

सर्वोच्च न्यायालयाच्या आदेशा उपरांत म्हादय लवादाची स्थापडूक जाली. लवादा मुखार 10 वर्सां सुनावणी जाली. सगळ्यांचे युक्तिवाद आयकुपा सयत कागदपत्रांचेर आदारीत लवादान निवाडो दिला. हो निवाडो अधिसुचीत जाला. निवाड्या प्रमाण कर्नाटकान प्रकल्पाचो आराखडो तयार केला. डीपीआराक मान्यताय मेळिल्ल्यान आतां प्रकल्पाचें काम सुरू जातलें, अशें बोम्मई हांणी सांगलें.
केंद्र सरकारान म्हादयचो प्रस्न सुटावो केला. गोंयच्या सहमतीन कर्नाटकाक म्हादयचें उदक घुंवडावपाक मेळटलें, अशें विधान केंद्रीय गृह मंत्री अमीत शाह हांणी बेळगांवां सभेंत केल्लें. ह्या तांच्या विधानाक लागून गोंयांत खवदळ पडला. विरोधकांनी मुख्यमंत्री डॉ. प्रमोद सावंत हांच्या राजिनाम्याची मागणी केल्या. हाचे उपरांत कर्नाटकाचे मुख्यमंत्री बोम्मई हांणी हुबळींत एके कार्यावळींत टप्प्या टप्प्यान प्रकल्पाचें काम पुराय जातलें, अशें म्हणलां. हाका लागून विरोधी पक्ष परतून आक्रमक जावपाची शक्यताय आसा.
कर्नाटकांत आतां विधानसभेची वेंचणूक जावपाची आसा. म्हादयचें उदक हो प्रचाराचो मुद्दो जाला. कळसा – भांडुरा प्रकल्पाक गोंयांत विरोध आसा. गोंयच्या विरोधाची कर्नाटक तशेंच केंद्रीय फुडाऱ्यांक जाणीव आसा. तरी लेगीत कळसा – भांडुरा पुराय करपाचे यत्न सोडपाची कर्नाटकाची तयारी ना. गोंय सरकारान कर्नाटका आड अवमानाचो अर्ज दाखल केला. अर्जाचेर बेगीन सुनावणी घेवपाची गोंयची मागणी आसा. राजकी पक्ष आनी सामाजिक संघटणांचीं आंदोलनां सुरू आसली तरी कायदेशीर लडायेचेर भर दिवपाची सगळ्यांची सुचोवणी आसा. सभाघर समितीची 8 फेब्रुवारीक बसका जातली. गृह मंत्री अमीत शाह तशेंच बसवराज बोम्मई हांच्या विधानाचेर हे बसकेंत चर्चा जावपाची आस्त आसा.

प्रधानमंत्र्यांच्या बंगळुरू भेटी कडेन लक्ष
प्रधानमंत्री नरेंद्र मोदी हे 6 फेब्रुवारीक बंगळुरू शाराक भेट दिवपाचे आसात. म्हादय विशीं आतां प्रधानमंत्री मोदी बंगळुरू भेटींत कितें उलयतात, हे विशीं उमळशीक आसा. राज्याचे उदका पुरवण मंत्री सुभाष शिरोडकार हांणी केंद्रीय गृह मंत्री अमीत शाह हांच्या विधानाचो निशेध केला. तांचे म्हणणें आमकां मान्य नाशिल्ल्याचें तांणी म्हणलांं. पर्यावरण मंत्री निलेश काब्राल हांणी लेगीत केंद्रीय गृहमंत्री अमीत शाह हांच्या विधानाचो निशेध केला.