भांगरभूंय | प्रतिनिधी
कर्नाटक मुख्यमंत्र्यांची कर्नाटक विधानसभेंत घोशणा
पणजी : म्हादयचें उदक घुंवडावन मलप्रभा न्हंयेंत सोडपी कळसा – भंडुरा प्रकल्पाच्या आराखड्याक (डीपीआर) केंद्र सरकारान मान्यताय दिल्ल्याची म्हायती कर्नाटकचे मुख्यमंत्री बसवराज बोम्माय हांणी विधानसभेंत दिल्या. प्रकल्प आराखड्याक मान्यताय दिले उपरांत केंद्रीय मंत्री प्रल्हाद जोशी हांणी कर्नाटकाचे मुख्यमंत्री, उदका पुरवण मंत्री गोविंद करजोळ, आदले मुख्यमंत्री बी एस येडीयुराप्पा हांकां परबीं दिवपी ट्वीट जारी केलां.
कर्नाटकाच्या मुख्यमंत्र्यांनी केल्ले घोशणेक लागून गोंयांत मात खवदळ पडला. म्हादयचें उदक घुंवडावपा खातीर बऱ्याच वर्सा सावन कर्नाटकाच्यो हालचाली सुरूच आशिल्ल्यो. हें प्रकरण न्यायप्रविश्ठ आसलें तरी काय दिसां पयलीं कर्नाटकान प्रकल्पा खातीर माती परिक्षण केल्लें. म्हादय बचाव आंदोलनातले कार्यकर्ते प्रो. राजेंद्र केरकार हांणी माती परिक्षणाच्या कामाची सरकाराक कल्पना दिल्ली. हाचे उपरांत कर्नाटकाचे उदका पुरवण मंत्री गोविंद करजोळ हांणी केंद्रीय जलशक्ती मंत्री गजेंद्रसिंह शेखावत हांकां कळसा – भंडुरा प्रकल्पा विशीं निवेदन दिल्लें. केंद्रीय मंत्री आनी कर्नाटकांतले खासदार प्रल्हाद जोशी हांचे मध्यस्थीन कर्नाटकाचे यत्न सुरूच आशिल्ले. आतां कळसा भंडुरा प्रकल्पाच्या आराखड्याक केंद्रान मान्यताय दिल्ल्याचें मुख्यमंत्री बसवराज बोम्माय हांणी विधानसभेंत सांगलें.
केंद्रीय मंत्री प्रल्हाद जोशी
कडल्यान मुख्यमंत्र्यांक परबीं
कळसा – भंडुरा प्रकल्प आराखड्याक केंद्रान मान्यताय दिल्ल्यान मुख्यमंत्री बसवराज बोम्माय हांकां हांव परबीं दितां. ते भायर आदले मुख्यमंत्री बी. एस. येडीयुरप्पा, राज्याचे उदका पुरवण खात्याचे मंत्री गोविंद करजोळ हांणी लेगीत आराखडो तयार करपाक खासा कश्ट घेतल्यात अशें ट्वीट केंद्रीय मंत्री प्रल्हाद जोशी हांणी केलां.
म्हादयचेर सेल्फी घेवपाची निमाणी संद : विजय सरदेसाय
म्हादयचेर सेल्फी घेवपाची ही निमाणी संद गोंयकारांक आसा. केंद्रान कर्नाटकाच्या प्रकल्प आराखड्याक मान्यताय दिल्ल्यान गोंया खातीर म्हादय सोंपल्या. सरकारान नव्या वर्साक लोकांक दिल्ली ही भेट आसा अशी खर प्रतिक्रिया गोवा फॉरवर्डाचे आमदार विजय सरदेसाय हांणी उक्तायली. म्हादय विशीं भाजप सरकार गंभीर ना हें पयलीं सावन दिसतालें. सरकाराच्याे हालचाली दुबावीत स्वरुपाच्यो आशिल्ल्यो, अशेंय विजय सरदेसाय हांणी म्हणलें.
म्हादयची श्वेतपत्रिका जारी करचीः युरी
म्हादय विशीं गोंय सरकार परतून एकदां अपेशी थारिल्ल्याचें उक्तें जालां. येता त्या अधिवेशनांत सरकारान म्हादयची श्वेतपत्रिका जारी करची. सर्वपक्षीय शिश्टमंडळा सयत प्रधानमंत्री नरेंद्र मोदी हांची भेट घेवची अशें विरोधी पक्ष फुडारी युरी आलेमांव हांणी म्हणलें.
केंद्राच्यो कर्नाटकाक अटी
– कळसा-भांडुरा प्रकल्पा खातीर गरजेचीं हेर सगली तंत्रीक परवानगी घेवप बंधनकारक.
– म्हादय उदका तंटो लवादाचे अटींक पाळो दिवप गरजेचें.
– म्हादय उदका नियोजन प्राधिकरणाची स्थापणूक करची पडटली.
म्हादयचें उदक घुंवडावपाक मेळचें ना : मुख्यमंत्री
रानजीव संरक्षण कायदो 1972 प्रमाण म्हादय न्हंयचें उदक कर्नाटकाक घुंवडावपाक मेळचें ना. प्रकल्प आराखड्याक मान्यताय मेळळी, तरी म्हादयच्या उदकाचेर परिणाम जावचो ना अशें ट्वीट मुख्यमंत्री डॉ. प्रमोद सावंत हांणी केलां. म्हादयचें उदक वाटावपा खातीर सरकार कटिबद्ध आसा. खंयचेच स्थितींत कर्नाटकाक म्हादयचें उदक घुंवडावपाक दिवचे नात अशें मुख्यमंत्र्यांनी स्पश्ट केलां. केंद्र सरकारान बेगिनात बेगीन म्हादय उदका वेवस्थापन प्राधिकरणाची स्थापना करची, अशी आमची मागणी आसा. ही मागणी आमी लावन धरतले अशेंय मुख्यमंत्र्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
