भांगरभूंय | प्रतिनिधी
एफडीएची कारवाय; 1 टन दर्जो नाशिल्लो म्हाल जप्त
म्हापशें: बागा- कळंगूट वाठारांत अन्न आनी वखदां प्रशासनान तीन काजूबियो विकपी दुकानां सयत एका गुदांवाचेर धाड घालून सील केलें. जाल्यार सुमार देड लाखांचो शंबर कील दर्जो नाशिल्ल्यो काजूबियो जप्त केल्यो.
काल (मंगळारा) अन्न आनी वखदां प्रशासनाच्या अधिकाऱ्यांनी कळंगूटे काजूबियो विकपी दुकानांची झडटी घेतली. हे तपासणे वेळार बालाजी काजू, पी. पटेल काजू आनी गोवा काजू हावस ह्या दुकानांतल्यान दर्जो नाशिल्ल्यो काजूबियो विकत आशिल्ल्याचें दिसून आयलें. पेड्डेर आनी बनावट आशिल्ल्यो काजूबियो पावकील वजनाच्या पाकिटांनी मिश्रीत करून विकूंक दवरिल्ल्याचें दिसून आयलें.
तशेंच गोवा काजू हावसाच्या गुदांवाची लेगीत अधिकाऱ्यांनी पळोवणी केली. ह्या गुदांवांतूय अशे तरेच्यो सामक्यो उणाक दर्जाच्यो काजूबियो दिसून आयल्यो. तशेंच ह्या गुदांवा खातीर प्रशासनाचो गरजेचो परवानो लेगीत घेवंक नाशिल्लो. ते खातीर वयल्या दुकानां सयत हो गुदांव लेगीत एफडीएन सील केलो.
तशेंच ह्या चारूय आस्थापनांतल्यान सुमार एक टन उणाक दर्जाच्यो काजूबियो जप्त केल्यो. ह्या जप्त केल्ल्या म्हालाचें मोल सुमार देड लाख रुपया आसून संबंदीत दुकानां आड एफडीए कायद्या प्रमाण गुन्यांव नोंद केला.
तशेंच ह्या पाकिटाच्या वजनांत लेगीत फरक दिसून आयिल्ल्यान वजन आनी माप खात्याक हे विशींचो अहवाल एफडीए कडल्यान सादर करतले.
एफडीएचे अधिकारी रिचर्ड नोरोन्हा, राजाराम पाटील, अमीत मांद्रेंकार, साफिया खान आनी लेनीन डिसा ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
