भांगरभूंय | प्रतिनिधी
रिसॉर्टांतल्या दोगां रुमबॉयक अटक
भांगरभूंय I प्रतिनिधी
म्हापशेंः कळंगूटे एका रिसॉर्टांत 37 वर्सां पिरायेचे एके रशियन पर्यटक बायलेचेर लिंगीक अत्याचाराचो प्रकार उक्ताडार आयला. ह्या प्रकरणांत पुलिसांनी दुबावीत सकील अन्सारी उर्फ सलमान झिरा जलाह (23) आनी सहीमुद्दीन अन्सारी अब्दूल अली (22) ह्या रिसॉर्टाच्या दोगां रुमबायजांक अटक केल्या. दुबावीत आरोपी मूळ बर्दीया नेपाळांतले आसात.
ही घडणूक बिरेस्तारा रातीं 10 ते 11 वराच्या सुमाराक घडली. रशियेंतल्या 18 जाणांचो पर्यटक गट बिरेस्तारा गोंयांत आयिल्लो. कळंगूटे एका रिर्सार्टांत ते देंविल्ले. पिडेस्त आनी तिच्याे दोगीं इश्टिणी एका कुडीत रावताल्यो.
फिर्यादी पिडेस्त बायलेच्यो दोगी इश्टिणी कुडी भायर पडल्यो आनी हेर गटांतल्या सहकाऱ्यां वांगडा रिसॉर्टाच्या आवारात भोंवपाक गेल्यो. वतना तांणी हॉटेल वेवस्थापकाक कुडींतली नितळसाण करपाक सांगलें. वेवस्थापकाक ह्या वेळार पिडेस्त बायल कुडींत एकलीच आशिल्ली हाची तांकां खबर नाशिल्ली.
वेवस्थापकाच्या सल्ला प्रमाण दुबावीत सहीमुद्दीन अन्सारी हो पिडेस्त बायलेचे कुडींत नितळसाण करपाक गेलो. ते उपरांत कांय वेळान दुबावीत सकील अन्सारी हो लेगीत कुडींत गेलो.
ह्या वेळार पिडेस्त बायल कुडींत न्हिंदील्ली. ही संद सादून दुबावीत सकील अन्सारी हांणी तिचेर लिंगीक अत्याचार केलो. तशेंच ताचो साथीदार सहीमुद्दीन अन्सारी हांणीय ते बायलेचेर बळजबरी केली.
ते उपरांत हॉटेल वेवस्थापना कडेन तिणें कागाळ केली. तशेंच शुक्रारा सकाळीं पिडेस्त बायलेन रितसर पुलिशेंत कागाळ केली. कागाळेंत पिडेस्त बायलेन दोगां दुबावितांची नांवां नमूद केल्या. पुलिसांनी सांजे दोगांय दुबावितांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
