भांगरभूंय | प्रतिनिधी
सरपंच जोजफ सिक्वेराची सतर्कता; 25 हजारांचो दंड
भांगरभूंय । प्रतिनिधी
म्हापशें: कळंगूटे शेत जमनींत बेकायदो तरेन टाकावू बांदकाम साहित्य उडोवपी नागव्या बांदकाम करप्याक पंचायतीन 25 हजारांचो दंड फर्मायलो.
बिरेस्तारा सकाळीं जीए 01 सी 6855 नंबराचे गाडयेंतल्यान शेत जमनींत कोयर उडयता तें सरपंच जोजफ सिक्वेरा हांचे नदरेक पडलें. रोखडेंच तांणी तांकां हटकिले आनी कोयर उडोवपी गाडयेच्या चालकाक धरलो. शेत जमनीचे धनी एकनाथ साळगांवकार, कळंगूट पुलीस आनी पंचायत सचिवाक हाची कल्पना दिली आनी तांकां घडणुकेचे सुवातेचेर आपयले.
चवकशे वेळार बांदकामाचे टाकावू साहित्य नागवें सर्कला वयले एके इमारतीचें आशिल्ल्याचें स्पश्ट जालें. पंचायती वतीन त्या बांदकाम प्रकल्पाचें बांदकाम करपी जयवंत सिंग हाका 25 हजारांचो दंड फर्मायलो. तशेंच कळंगूट पुलिसांनी कायद्या प्रमाण कारवाय केली. सरपंचान हो कोयर उडोवप्याक रंगेहात धरलो. शेत जमनींत उडयिल्ली रास पळयल्यार फाटल्या कितल्याशाच दिसां सावन थंय कोयर हाडून उडयतात तें स्पश्ट जाता. पंचायतीन संबंदिताक 25 हजार रुपयांचो दंड दिला. रस्त्याचे कुशीक कोयर उडोवप्यां आड अशे तरेन जनजागृती आनी कोयर मुक्त तशेंच नितळ पंचायत वाठारा खातीर अशी कारवाय करतले, अशें पंचायत सचिवान ह्या वेळार सांगलें.
बऱ्यान कोयर काडातः सरपंचाची शिटकावणी
म्हापशें शारांत वतना हो कोयर उडयतना आमकां दिसलें. आमी हे आदीं अशे तरेचें टाकावू बांदकाम साहित्य शेत जमनींत उडोवपाच्या प्रकारा आड कळंगूट पुलीस, नगरनियोजन खातें, उत्तर गोंय नियोजन उदरगत प्राधिकरण आनी उपजिल्होधिकाऱ्यां कडेन कागाळ केल्या. पूण त्या कागाळींची कार्यवाही जावंक ना. ताका लागून हेर पंचायतींतलो कोयर कळंगूट पंचायत वाठारांत हाडून उडयतात. हो कोयर थंयच्यान जे मेरेन पुराय काडिनात ते मेरेन आमी ओगी बसचे नात, अशी शिटकावणी सरपंच जोजफ सिक्वेरा हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
