कळंगूटेच्या डान्सबारांक कुलूप: मुंबय उच्च न्यायालयाच्या गोंय खंडपीठाचो आदेश

भांगरभूंय | प्रतिनिधी

म्हापशें, प्रतिनिधी: मुंबय उच्च न्यायालयाच्या गोंय खंडपीठान कळंगूटे डान्सबार बंद करपाचे आदेश दिल्या उपरांत उपजिल्होधिकार्‍यांनी रोखडीच कारवायेक सुरवात केली. तांणी रोखडोच प्रदूशण नियंत्रण मंडळाक आदेश जारी केलो. उपरांत बार्देशच्या ७ मामलेदारांचे हाजेरींत मंडळान कळंगूटेच्या ११ डान्सबारांक कुलपां घातलीं.

कळंगूटे वाठारांत कांय कडेन बार ऍण्ड रेस्टोरंटांनी जाल्यार कांय बेकायदेशीर डान्स बार्रां सुरू आसात, अशी जनहीत याचिका खंडपीठांत दाखल जाल्ली. हाचेर जाल्ले सुनावणे वेळार ‘पळोवणी करून परवाने नाशिल्लीं डान्स बार्रां रोखडींच बंद करात’ अशे निर्देश खंडपीठान प्रदूषण नियंत्रण मंडळाक दिल्ले.

सुदेश मयेंकार आनी कुंदन केरकार हांणी ही याचिका दाखल केल्ली. तातूंत तांणी राज्य सरकार, पर्यटण संचालक, उत्तर गोंय जिल्होधिकारी, उत्तर गोंय पुलीस अधीक्षक, उत्तर गोंय पुलीस तशेंच पर्यटन विभागाचे उपअधीक्षक, कळंगूटे पुलीस निरीक्षक, कळंगूटे पंचायत, अबकारी खातें, राज्य कर आयुक्त, गोंय राज्य प्रदूषण नियंत्रण मंडळ, पंचायत संचालक, बार्देस गटविकास अधिकारी (बीडीओ), नगरनियोजन खातें, उजो पालोवपी दळ, जेवण आनी वखदां प्राधिकरण हाचे सयत १३ डान्स बार धनयांक प्रतिवादी केल्यात.

कुलूप घातिल्लीं डान्स बार्रां

१. पॉश नॉश, २. डेव्हिलस्स, ३. कूडा मुफसा, ४. मैफिल, ५. थ्री किंग्ज, ६. नेक्स्ट लेव्हल/ज्युपिटर, ७. नॉर्मस पब/ क्लब नो एस्केप, ८. ब्लॅक हार्ट/ब्रेकडावन, ९. ३९ स्टेप्स, १०. ट्रॉपिकल लॉग्ज, ११. प्लॅनिटेन लायफ

मजगतीं, मुख्यमंत्री डॉ. प्रमोद सावंत हांणीय डान्सबार्रांच्या आड कारवायेची शिटकावणी दिल्या. डान्सबारच्या नांवाखाला पर्यटकांक लुटप्यांचेर आतां खर कारवाय करतले. अश्या आस्थापनांचे परवाने रद्द करतले. तांकां परत परवाने मेळचे ना, अशी शिटकावणी मंत्रिमंडळ बसकेंत मुख्यमंत्र्यांनी दिल्ली.