भांगरभूंय | प्रतिनिधी
भांगरभूंय । प्रतिनिधी
म्हापशेंः सगल्यांची नदर आशिल्ल्या कळंगुटे पंचायतीच्या सरपंचपदार जोजफ सिक्वेरा आनी उपसरपंचपदार गीता परब हांची बिनविरोध निवड जाली. भाजपान हे पंचायतीचेर आतां वर्चस्व मेळयलां. आमदार मायकल लोबो हांच्या हातांतल्यान ही पंचायत गेल्या. हाचे पयलीं ह्या दोगानींय सरपंच म्हणून काम केला.
लोबो हांच्या पॅनलांतले फकत तिग जाण वेंचून आयिल्ले. तांतूतल्यान एकल्यान सिक्वेरा पॅनलाक तेंको जाहीर केल्लो. सगल्या पंचांनी एकठांय येवन आपली सरपंच म्हणून निवड केल्या तेन्ना पंचायत मंडळ भाजपाचें वा काँग्रेसाचें अशें म्हणपाक जायना अशें जोजफ सिक्वेरा हांणी सांगलां. सरपंच म्हणून पांच वर्सांचो कार्यकाल पुराय करतलो अशें तांणी स्पश्ट केलें. 2017 वर्सा जेन्ना हांव सरपंच आशिल्लो तेन्ना पंचायतीचे तिजोरेंत 18 कोटी रुपया आशिल्ले. आतां फकत 2 कोटी आसात अशी म्हायती तांणी दिली.
कळंगुटे पंचायत वाठारांतल्या गल्यो बेकायदेशीर गजाली बंद करपाचें उतर तांणी दिला. डान्सबार, स्पा, ड्रग्ज, दलाल हांकां पंचायत वाठारांत थारो आसचो ना अशेंय तांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
