भांगरभूंय | प्रतिनिधी
मंत्री गाेविंद गावडे हांणी फोडलें बांदकाम खात्याचेर खापर
पणजी : कला अकादमी नुतनीकरणाच्या कामांत भ्रश्टाचार जाल्ल्याचो आरोप भाजपाचे म्हणयारे वेळ्ळीचे सावियो रॉड्रिग्ज हांणी करून भाजपाक घरचो अहेर दिला. तशेंच तांणी कला आनी संस्कृती खात्याचे मंत्री गोविंद गावडे हांचेर टिका केल्या. ह्या आरोपा उपरांत मंत्री गावडे हांणी भौशीक बांदकाम खात्या कडेन बोट दाखयलां. निविदा जारी करिनासतना काम करपाचो निर्णय भौशीक बांदकाम खात्यान घेतला. ह्या निर्णया कडेन कला आनी संस्कृती खात्याचो संबंद ना, अशें सांगून तांणी भौशीक बांदकाम खात्याचेर खापर फोडलां.
कला अकादमीचें दुरुस्ती काम शहाजहाँन रूटान जालां. शहाजहाँन रूटान जाल्ल्या कामांत बांदकाम खातें भागिदार आसा. आतां बांदकाम खात्याच्या मंत्र्यान हाचेर स्पश्टीकरण दिवचें, अशी मागणी विजय सरदेसाय हांणी केल्या.
फाटले वर्सभर कला अकादमी नुतनीकरणाचें काम सुरू आसा. ह्या कामाची निविदा जारी जावंक ना. निविदा जारी करिनासतना सरकाराच्या पसंतीच्या कंत्राटदारा वरवीं दुरुस्तीचें काम सुरू आसा. कामाक सुरवात जावन वर्स जालां, आतां ते पुराय जावपाच्या मार्गार आसा. कामाची निविदा जारी करिनासतना ते पसंतीच्या कंत्राटदारा वरवीं करपाच्या निर्णयाचेर बरीच टिका जाल्या. आमदार विजय सरदेसाय हांणी ह्या कामांत भ्रश्टाचार जाल्लाचो आरोप विधानसभेंत केल्लो. काँग्रेसीन लेगीत कामाच्या पद्दतीक आक्षेप घेतिल्लो.
कला अकादमी दुरुस्तीचें काम विधानसभा वेंचणुके पयलीं सुरू जाल्लें. तेन्ना गोविंद गावडे हेच कला आनी संस्कृती खात्याचे मंत्री आशिल्ले. भौशीक बांदकाम खात्याचे मंत्री दीपक पाऊसकार आशिल्ले. आतां निलेश काब्राल भौशीक बांदकाम खात्याचे मंत्री आसात. कला अकादमीचे चडशें काम पुराय जालांं. नोव्हेंंबर सोंपपाक काम पुराय जातलें, अशें मंंत्री गोविंंद गावडे हांंणी सांंगलें.
भारतीय जनता पक्षाचे म्हणयारे सावियो रॉड्रिग्ज हांंणी कला अकादमीच्या कामांत भ्रश्टाचार जाल्ल्याचो आरोप केला. दुरुस्तीचें काम निविदा जारी करून जावपाची गरज आसली. निविदा जारी करिनासतना थारावीक कंंत्राटदाराक वर्क ऑर्डर दिवप नेमांत बसना, अशें ट्विट सावियो रॉड्रिग्ज हांंणी केलांं.
नुतनीकरणाचें 50 कोटींचें काम निविदा जारी करिनासतना करपाचो निर्णय मंंत्री घेता. शहॉजहाँन हांंणी ताज महालाची निविदा काडूंक नासली, अशें सांंगत तो हाचें समर्थन करतां. हाचेर दक्षता संचालनालयान आक्षेप घेतला. हो मार्ग कित्याक? अशें ट्विट सावियो रॉड्रिग्ज हांंणी केलांं.
प्रधानमंंत्री नरेंंद्र मोदी हे भ्रश्टाचाराचीं पाळां मुळांं नश्ट करपाचे यत्न करीत आसतना, डॉ. प्रमोद सावंंत सरकाराक ह्या मार्गान वचपाची गरज कित्याक पडली? अशेंय ट्विट तांंणी केलांं.
भाजपा म्हणयाऱ्यान कला अकादमी दुरुस्तीत भ्रश्टाचाराचो आरोप केले उपरांंत मंंत्री गावडे हांंणी भौशीक बांंदकाम खात्या कडेन बोट दाखयलांं.
प्रस्न भौशीक बांदकाम खात्याक विचारात: गावडे
कला अकादमी नुतनीकरणाचें जे काम चलतां, ते भौशीक बांदकाम खात्या वरवीं. ह्या कामांत कला आनी संस्कृती खात्याची कसलीच भुमिका ना. कला अकादमी कलेची वास्तू आशिल्ल्यान ती कला आनी संस्कृती खात्याच्या अखत्यारीत येता. दुरुस्तीचें काम कशें पद्दतीन करप, हाचो निर्णय भौशीक बांदकाम खात्यान घेतला. निविदा जारी करप वा ना, हे भौशीक बांदकाम खात्याचेर निंबून आशिल्ले. निविदा जारी करिनासतना तांणी दुरुस्तीकाम करपाचो निर्णय कित्याक घेतलो हो प्रस्न भौशीक बांदकाम खात्याक विचारचो. कला आनी संस्कृती खात्यान हो निर्णय घेवंंक ना. आपूण हे विशीं कितेच सांगपाक शकना, अशें मंत्री गोविंद गावडे हांणी म्हणलें.
आतां भौशीक बांंदकाम मंंत्र्यांंन स्पश्टीकरण दिवचें: विजय सरदेसाय
कला अकादमी दुरुस्तीचें काम शहाजहाँन रूटान सुरू आसा. ह्या कामात भौशीक बांंदकाम खातें लेगीत भागिदार आसा काय कितें? हे भौशीक बांंदकाम खात्याच्या मंत्र्यान स्पश्ट करचे, अशी मागणी विजय सरदेसाय हांंणी केल्या. तशेंच निविदा जारी करिनासतना 50 कोटींचें काम जावप हे सीपीडब्लुडीच्या नेमांत बसना. हातूंत भ्रश्टाचार जाल्ल्याचो आरोप आपणें हाचे पयलीच केल्लो, अशें विजय सरदेसाय हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.