भांगरभूंय | प्रतिनिधी
मंत्री गावडेः आपणाचेर जावपी आरोप निरर्थक
भांगरभूंय I प्रतिनिधी
पणजी : कला अकादमी नुतनीकरण तशेंच निविदे विशींचो निर्णय मंत्रीमंडळाचे मान्यताये उपरांत जाला. कला अकादमी नुतनीकरणाचेर मंत्रीमंडळ बसकेंत चर्चा जाल्या, अशें कला आनी संस्कृती खात्याचे मंत्री गोविंद गावडे हांणी सांगलें. ज्या झाडाक सगल्यांत चड फळां आसतात त्या झाडाचेर चड फातर मारतात, अशें तांणी आरोपांक जाप दितना सांगलें.
कला अकादमी नुतनीकरणाचें जे काम चलतां, ते भौशीक बांदकाम खात्या वरवीं. ह्या कामांत कला आनी संस्कृती खात्याची कसलीच भुमिका ना. कला अकादमी कलेची वास्तू आशिल्ल्यान ती कला आनी संस्कृती खात्याच्या अखत्यारीत येता. दुरुस्तीचें काम कशें पद्दतीन करप, हाचो निर्णय भौशीक बांदकाम खात्यान घेतला. निविदा जारी करप वा ना, हे भौशीक बांदकाम खात्याचेर निंबून आशिल्ले. निविदा जारी करिनासतना तांणी दुरुस्ती काम करपाचो निर्णय कित्याक घेतलो हो प्रस्न भौशीक बांदकाम खात्याक विचारचो, अशें मंत्री गोविंद गावडे हांणी म्हणलें.
ते उपरांत निविदे विशीं निर्णय कला आनी संस्कृती खात्यान घेतला. आपणें फायली मागयल्यात. अभ्यास सुरू आसा, अशें भौशीक बांदकाम खात्याचे मंत्री निलेश काब्राल हांणी सांगिल्लें. हाका लागून हो वाद आतां वाडत आसा. कला अकादमीचो निर्णय मंत्रीमंडळ मान्यताये उपरांत जाला. आपणाचेर जावपी आरोप निरर्थक आसात अशें मंत्री गोविंद गावडे हांणी सांगलें.
फाटले वर्सभर कला अकादमी नुतनीकरणाचें काम सुरू आसा. कामाक सुरवात जावन वर्स जालां, आतां ते पुराय जावपाच्या मार्गार आसा. कामाची निविदा जारी करिनासतना ते पसंतीच्या कंत्राटदारा वरवीं करपाच्या निर्णयाचेर बरीच टिका जाल्या. आमदार विजय सरदेसाय हांणी ह्या कामांत भ्रश्टाचार जाल्लाचो आरोप विधानसभेंत केल्लो. काँग्रेसीन लेगीत कामाच्या पद्दतीक आक्षेप घेतिल्लो.
कला अकादमी दुरुस्तीचें काम विधानसभा वेंचणुके पयलीं सुरू जाल्लें. तेन्ना गोविंद गावडे हेच कला आनी संस्कृती खात्याचे मंत्री आशिल्ले. भौशीक बांदकाम खात्याचे मंत्री दीपक पाऊसकार आशिल्ले. आतां निलेश काब्राल भौशीक बांदकाम खात्याचे मंत्री आसात. नोव्हेंंबर सोंपपाक काम पुराय जातलें, अशें गावडे हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
