भांगरभूंय | प्रतिनिधी
14 ऑक्टोबर ते 9 नोव्हेंबर मेरेन प्रवेश अर्ज उपलब्ध
पणजी: कला अकादमीच्या भारतीय संगीत आनी नाच विभागांत विवीध अभ्यासक्रमां खातीर कलेची आवड आशिल्ल्या विद्यार्थ्यांकडल्यान प्रवेशअर्ज मागयल्यात. हे प्रवेशअर्ज 2023 च्या शिक्षणीक वर्सा खातीर आसतले. ह्या अभ्यासक्रमांत भारतीय संगीता खाला शास्त्रीय गायन, पेटी वादन, बांसरी वादन तशेंच तबलें वादन, भरतनाट्यम आनी कथ्थक नाच अश्या जायत्या तरांचें विशेश प्रशिक्षण दितले. ह्या सगळ्या अभ्यासकमां खातीर पयल्या वर्साच्या प्रवेशा खातीर पिरायेची मर्यादा 10 वर्सां तरी आसतली. 31 डिसेंबर 2022 मेरेन वयाचीं 10 वर्सां पुराय केल्ल्यानीच ह्या उपक्रमा खातीर अर्ज करचे. चडांत चड पिराय 35 आसतली.
इत्सुकांक प्रवेशा खातीरचो अर्ज आनी म्हायती पत्रक ता. 14 ऑक्टोबर ते 9 नोव्हेंबर 2022 ह्या काळांत सकाळीं 10 ते 1 आनी दनपरां 2 ते 4 वरां मेरेन कला अकादमीच्या लेखा विभागांत मेळटलो. इत्सुकांनी आपले पुराय भरिल्लेे अर्ज ता. 9 नोव्हेंबराक सांजच्या 5 वरां मेरेन जल्म दाखल्या सयत आदलें सचिवालय पणजी, लेखा संचालनायाच्या फुडल्यान, पणजी, गोंय ह्या नाम्याचेर सादर करचे. निमाणे मुदती उपरांत अर्ज स्विकारचे ना हाची संबंदितांनी नोंद घेवची.
ता. 15 नोव्हेंबराक तबलें, शास्त्रीय गायन, बांसरी, पेटी तशेंच भरतनाट्यम आनी कथ्थक नाच (सकाळीं 10 ते दनपरां 1) आनी (दनपरां 2 ते सांजच्या 5 वरां मेरेन) कला अकादमीचो हिंदुस्थानी संगीत आनी नाच विभाग हो गव्हर्मेन्ट पॉलिटॅक्नीक क्वाटर्स, आल्तीनो, पणजी हांगा स्थलांतरीत केल्ल्यान क्वाटर्स नं., डी-2-1 आनी डी-2-2 (भरतनाट्यम आनी कथ्थक), क्वाटर्स् नं. डी-3-1 आनी डी-3-3 (शास्त्रीय गायन, पेटी आनी तबलें) हांगा हे वर्ग सुरु केल्ल्यान हाची चाचणी वयल्या सुवातांचेर जातली हाची सगळ्यांनी नोंद घेवची.
तशेंच कला अकादमीच्या पेडणें हांगा राजू बर्वे (9420725283), वाळपय केंद्र मुखेली रामचंद्र नायक (9923615910), सांखळेची प्रचला आमोणकार (8830766470), काणकोणची नितू महाले (7218619697), केपें हांगचे अमित भोसले (7083229956) आनी सांग्यांर समृदधी थळी (9130547829) हांगच्या संगीत केंद्रांत शास्त्रीय गायन, तबलें आनी पेटी वादनाचें प्रशिक्षण दिता. इत्सूक विद्यार्थ्यांनी प्रवेशा खातीर हांगच्या केंद्र मुखेल्यां कडेन ता. 7 नोव्हेंबर ते 25 नोव्हेंबर 2022 ह्या काळांत संपर्क करचो, अशे कला अकादमी वतीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
