भांगरभूंय | प्रतिनिधी
विजय सरदेसायः नाजाल्यार आतांचो ‘शहाजहाँन’ भ्रश्ट आशिल्ल्याचें जातलें सिद्ध
भांगरभूंय I प्रतिनिधी
पणजी : कला अकादमी नुतनीकरण कामाची तीन वांंगड्याच्या समिती वरवीं चवकशी करपाची शिफारस दक्षता संंचालनालयान केल्या. ही शिफारस मान्य करून सरकारान समिती वरवीं चवकशी करची. समितीचे वांंगडी सरकारी अधिकारी आसचे न्हय, अशी मागणी गोवा फॉरवर्डाचे मुखेली आनी आमदार विजय सरदेसाय हांंणी केल्या.
सरकारान चवकशी समिती स्थापन केली ना, जाल्यार सध्याचो शहाजहाँन भ्रश्ट आशिल्याचें सिद्ध जातलें, अशें विजय सरदेसाय हांंणी म्हणलें. कला अकादमीच्या नुतनीकरण कामाची निविदा प्रक्रिया सारकी जावंंक ना. नुतनीकरणाचेर जाल्लो खर्च चड आसा, असो मुद्दो आपणें विधानसभेंत मांडिल्लो. शहाजहाँनान ताजमहाल बांंदतना निविदा जारी करूंंक नासली, अशें तेन्ना कला आनी संंस्कृती खात्याचे मंंत्री गोविंंद गावडे हांंणी म्हणिल्लें. आतां दक्षता संंचालनालयान चवकशी खातीर समिती स्थापन करपाची शिफारस केल्या. ताका लागून अामी उपस्थीत केल्ल्या मुद्यांत तथ्य आसा, अशें स्पश्ट जालांं.
ताजमहाल बांदतना शहाजहाँन निविदा जारी करूंक ना. ते प्रमाण कला अकादमीच्या कामा खातीर निविदा जारी करुंक ना. पूण ह्या प्रकरणाची समिती वरवीं चवकशी जावपाक जाय. ना जाल्यार आताचो शहाजहाँन भ्रश्ट आसा, हे सिद्ध जातलें. कला अकादमी प्रमाण हेर ताजमहाल तो उबारतलो, अशें विजय सरदेसाय हांंणी सांगलें.
कला अकादमी नुतनीकरणाच्या कामांत भ्रश्टाचाराचे कागाळींत तथ्य आशिल्ल्याचो मुळावो निश्कर्श आसा. तीन वांगड्यांचें खासा तंत्रीक समिती वरवीं भ्रश्टाचाराची चवकशी करची, अशी शिफारस दक्षता संचालनालयान सरकाराक केल्या. हे तीन वांगडी भौशीक बांदकाम खात्यांतले आसूंक जायनात अशें दक्षता संचालनालयान म्हणलां.
भौशीक बांदकाम खात्यान तशेंच कला आनी संस्कृती खात्यान मंत्रीमंडळाची दिशाभूल करपाची शक्यताय आसा. हाका लागून 49 कोटींचो खर्च नुतनीकरणाचेर करचो पडलो अशें दक्षता संचालनालयाचें मत आसा.
पुलीस निरिक्षका आड कारवाय करचीः ताम्हणकार
कला अकादमीच्या नुतनीकरण कामा आड सुदिप ताम्हणकार हांंणी भ्रश्टाचार प्रतिबंधक फांट्या कडेन कागाळ केल्ली. हे कागाळे उपरांंत गुन्यांव नोंद जावंंक ना. फौजदारी दंंड संहितेच्या 154 (1) कलमा खाला गुन्यांव नोंद करपाची मागणी तांंणी केल्ली. ही कागाळ पुलीस निरिक्षकान भायरायली. गुन्यांव नोंद करपा सयत संंबंदीत पुलीस निरिक्षका आड कारवाय करपाची मागणी सुदिप ताम्हणकार हांंणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
