भांगरभूंय | प्रतिनिधी
तिनूय सल्लागार परतून करतले पळोवणी
भांगरभूंय । प्रतिनिधी
पणजी : कला अकादमीच्या नाटकघरा संबंदांत कृतीदळाचे शिफारशी प्रमाण भौशीक बांदकाम खात्यान (पीडब्ल्यूडी) नेमिल्ले रॉजर ड्रेगो (आवाज यंत्रणा), शिकल तळपदे (उजवाड यंत्रणा) आनी राजन भिसे (माची) ह्या सप्तकांत परतून एकदां नाटकघराची पळोवणी करतले. तांचे शिफारशीं प्रमाण नाटकघराचीं कामां हातांत घेतले. सल्लागारांनी उणाव दाखयल्लीं जीं कामां आदल्या कंत्राटदारान केल्यात, त्या कामांचे पयशे ताचे कडल्यान वसूल करून घेवन ताका काळे वळेरेंत घालतले, अशी म्हायती पीडब्ल्यूडीच्या सुत्रांनी ‘भांगरभूंय’ कडेन उलयतना दिली.
नुतनीकरण केल्ल्या कला अकादमीच्या नाटकघरांत उणाव दिसून आयले उपरांत कृतीदळाचे शिफारशीं प्रमाण पीडब्ल्यूडीन तीन सल्लागारांची नेमणूक केल्ली. ह्या सल्लागारांनी कांय दिसां आदीं सरकाराक अहवाल सादर करून, कला अकादमींत नाटकां सयत इफ्फीच्या काळांत चित्रपट लेगीत दाखयतात. ताचो विचार करून संबंदीत सल्लागारान नाटक आनी चित्रपट ह्यो दोनूय गजाली दोळ्या मुखार दवरून नाटकघराची रचना केली. हें नाटकघर चित्रपट दाखोवपाचे नदरेन दर्जेदार आसा, पूण नाटकां खातीर आवाज आनी उजवाड यंत्रणा योग्य ना. ते खातीर तातूंत बदल करचे. तशेंच नाटकघरांत आशिल्ले ‘एसी’चो आवाज नाटक चालू आसतना मायकांत वता. ताचो मार अभिनय करपी कलाकारांक बसता. हे खातीर नाटकघरांतल्यान एसी काडून थंय वेगळे तरेची वेवस्था करची, अशेंय सल्लागारांनी अहवालांत म्हणिल्लें. मजगतीं, हे तिनूय सल्लागार ह्या सप्तकांत परतून नाटकघराची पळोवणी करतले आनी तांच्या सल्ल्या प्रमाण गरजेचे ते बदल करपाचें काम सुरू जातलें. ताचे खातीर जुलय आनी ऑगस्ट अशे दोन म्हयने नाटकघर बंद दवरपाचो विचार लेगीत कला अकादमीन चलयला, अशें सुत्रांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
