कला अकादमीची कोंकणी नाटकां सर्त 18 फेब्रुवारीक सुरू

भांगरभूंय | प्रतिनिधी

पणजीः कला अकादमीची 49वी कोंकणी नाटकांची सर्त 18 फेब्रुवारीक फोंडेंच्या राजीव गांधी कला मंदिरात सुरू जातली. अंदूं हे सर्तींत 21 पंगड वांटेकार जाल्यात. पूण सर्त सुरू जातकच कांय पंगड नाटक फाटीं घेवपाचीय शक्यताय आसता. पोरूं हे सर्तींत 23 पंगडांनी वांटो घेतिल्लो.

कला अकादमीची ही सर्त 1976 -77 वर्सा सुरू जाल्ली. हे सर्तीक फुडल्या वर्सा अर्दशेंकडो म्हळ्यार 50 वर्सां पुराय जातलीं. कला अकादमीन 2001 वर्सा हे सर्तीची म्हायती दिवपी एक सोबीत पुस्तिका उजवाडायिल्ली. फुडल्या वर्साय 50 वर्सांचो सर्तीचो इतिहास आनी नियाळ घेवपी पुस्तक उजवाडाक येवचें अशी साबार कलाकारांची मागणी आसा.

हे सर्तीन प्रायोगीक कोंकणी नाटकांची बुन्याद घाली आनी कोंकणी नाटक साच्यांतल्यान भायर काडून दर्जो आशिल्ल्यो भरारी मारपी वेगळ्योवेगळ्यो कलात्मक शक्यतायो कोंकणी रंगमाचयेक दाखोवन दिल्यो.

एलीट पांवड्याचीं मौलीक नाटकां तशेंच अणकारीत नाटकां सर्तींत जावपाक लागलीं. कला अकादमींत नाट्य शाळा सुरू जाल्ल्यान थंयसरले तालमींत तयार जावपी नाट्य कलाकारांनी तंत्रीक आनी सगल्या आंगांनी कोंकणी नाटक उंचायेर पावलें. कोंकणी आनी कलेच्या मोगान वावुरपी लेखक, दिग्दर्शक, नट, तंत्रज्ञ हांणी कोंकणी नाटकाक घटाय हाडली.

एका तेंपार सर्तींत उणींच पांच नाटकां येवन ही सर्त जातली काय ना असो हुस्को जातालो. पूण आतां सरासरी 20 नाटकां सर्तींत जावपाक लागल्यांत.

हालींसराक हे सर्तींत मौलीक स्वतंत्र नाटकांचो आंकडो उणो उरता हें वेळापत्रका वेल्यान दिसून येता. तंत्रीक आंगां घसघशीत आसतात पूण उच्चार आनी वाचीक अभिनय सुदारपाची गरज आसा आनी ते खातीर खेरीत यत्न करूंक जाय अशें जाणकारांनी सांगलें. कोंकणीचे नाकयां स्वरुपाचे स्पश्ट उच्चार, हेळे, विराम हें आंग सर्तींत बळिश्ट आनी अचूक जावपाची गरज तज्ञ परगटायतात.