भांगरभूंय | प्रतिनिधी
मुख्यमंत्री सावंत हांकां बरयलें पत्र
पणजी, प्रतिनिधी: विरोधी पक्ष फुडारी युरी आलेमाव हांणी आयज मुख्यमंत्री डॉ. प्रमोद सावंत हांचे कडेन गोंय सांस्कृतीक धोरण २००७ आनी गोंय खेळां धोरण २००९ ची प्रभावीपणान चालीक लावन कलाकारांक नोकरेंत आरक्षण दिवपाची मागणी केली. सांस्कृतीक मळार प्रतिभावंत विद्यार्थ्यांक़ ग्रेस मार्क्सची तरतूद लागू करपाची मागणीय तांणी केली.
मुख्यमंत्र्यांन बरयल्ल्या पत्रात तांणी, कला आनी संस्कृती आनी खेळां मळावयल्या थळाव्या प्रतिभांक उर्बा दिवपाची सुरवात काँग्रेस सरकारान केल्ली हाचोय उल्लेख केला. ह्या धोरणांत सांस्कृतीक मळार प्रतिभावान विद्यार्थी आनी खेळगड्यां खातीर ग्रेस मार्क्सची तरतूद आसा. कलाकार आनी खेळगड्यांक नोकरेंत आरक्षण ह्या दोनूय धोरणांनी तरतूद आसा. २०१२ उपरांत सेगीत सत्तेंत आयिल्लें भाजप सरकार हीं दोनूय धोरणां प्रभावीपणान अंमलात हाडपाक अपेशी थारलां अशें युरी आलेमाव हांणी मुख्यमंत्र्यांच्या निदर्शनाक हाडून दिलां.
गोंयच्या खेळगड्यां खातीर ४ टक्के कोटा राखून दवरपाची मुख्यमंत्र्यान हालींच घोशणा केल्ली. ते विशीं सांस्कृतीक धोरण आनी खेळां धोरण प्रभावीपणान चालीक लावन ताचो संबंदितांक लाव दिवपाची मागणी आपल्या पत्रांत केल्या.
३७ व्या राष्ट्रीय खेळांतलें पदक जैतिवंतांक सरकारी नोकर्यो दिवपाची मुख्यमंत्र्याची घोशणा आनी मीस इंडिया डेफ इंटरनॅशनल रनर अप विनिता शिरोडकार हांकां हालींच दिल्ल्या सरकारी नोकरेच्या आस्वासनाची याद पत्रांत केल्या.
सांस्कृतीक मळार विद्यार्थ्यांक ग्रेस मार्क्स दिवपा खातीर गोंय सांस्कृतीक धोरणांतले तरतुदीच्या अंमलबजावणी खातीर हांव सरकारकडेन सतत फाटपुरवण करतां. दुर्दैवान फाटल्या इकरा वर्सांनी ताची अंमलबजावणी करपाक भाजप सरकाराक अपेस आयलां. सरकार येवपी नव्या वर्सा सावन ह्या दोनूय धोरणांची अमलबजावणी करतलें अशीं आपल्याक आस्त आसा अशें युरी आलेमाव हांणी म्हणलां.
कॉंग्रेस सरकारान २००७ आनी २००९ वर्सा गोंय सांस्कृतीक धोरण आनी गोंय खेळां धोरण तयार केल्लें. अधिसुचोवणीय काडिल्ली. तज्ञांचें मत घेवन हीं धोरणां तयार केल्यां. मात भाजपा तें चालीक लावपांत अपेशी थारलां. सरकार जानेवारी २०२४ सावन कर्मचारी निवड आयोगा वरवीं गट क भरती प्रक्रिया सुरू करतले अशी आस्त आसा अशें युरी आलेमाव हांणी पत्रांत निमाणें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
