भांगरभूंय | प्रतिनिधी
घुंवळे वखदांचे चवकशे खातीर सद्या हैदराबादेंत
पणजी : भाजपाची फुडारी सोनाली फोगट हांची कूड ज्या थळार मेळिल्ली, त्या कर्लीस शॅक्साचे धनी एडवीन नूनीस हाका हैदराबाद पुलिसांंनी अटक केल्या. हैदराबाद नार्कोटिक्स एनफोर्समेंट विंंग हांंणी शुक्रारा उसरां ताका अटक केली. गोंयांंत अटक केले उपरांंत शेनवारा ताका हैदराबादेंत व्हेलो.
एडवीन नूनीस हाचो प्रवास थक्क करपी आसा. शॅक्सांत वेटर म्हूण तांणें करियर सुरू केल्लें. आतां तो तीन हॉटेलांंचो धनी आसा. ते भायर ताची तीन घरांं आसात. हैदराबादचे पुलीस आयुक्त सी. व्ही. आनंंद हांंणी ही म्हायती दिली. घुंवळे वखदां वेव्हारांतलो तो सध्या बादशाह आसा. नूनीस हाचे आड गोंयांंत चार गुन्याव नोंंद जाल्यात. ते भायर ओसमानिया विद्यापीठ, रामगोपालपेठ आनी लालगुडा पुलीस स्टेशनांत ताचे आड तीन गुन्यांव नोंंद आसात. तो जेन्ना जामिनाचे सोपस्कार पुराय करपाक पुलीस स्टेशनार आयिल्लो तेन्नाच ताका पुलिसांंनी ताब्यात घेतलो. खबऱ्यानी ताची आमकां म्हायती दिल्ली. गोंंयच्या प्रशासनाक कळोवन ताका आमी हैदराबाद हाडलो.
घुंंवळे वखदां खंयच्यान
हाडटालो तें सोदपाचें आव्हान
एडवीन नूनीस हाका अटक केल्ल्यान घुंंवळे वखदां वेव्हारांतले हेर दुबावीत जाळ्यांत सांपडप शक्य जालां. प्रितेश बोरकार हाणें 6 नांवांं दिल्लीं. हातूंत नूनीस हाचें नांव आशिल्लें. हाका लागून ताचे मेरेन पावप शक्य जालें. एडवीन नूनीस हो घुंंवळे वखदां खंयच्यान हाडटालो ताचो सोद घेवपाचें आव्हान पुलिसांं मुखार आसा.
सोनाली फोगट हिका 23 ऑगस्टाक दुबावीत रितीन मरण आयिल्लें. मरण आयले उपरांत तिका हॉस्पिटलांत दाखल केल्ली. ह्या प्रकरणांत गोंय पुलिसांनी पयलीं फोगट हिका सैमीक रितीन मरण आयिल्ल्याचें नोंद केल्लें. पूण फोगट हिचो भाव रिंकू ढाका हो गोंयांत आयले उपरांत आपले भयणीचो खून जाल्ल्याचो दुबाव उक्तावन चवकशी करपाची मागणी केली. गोमॅकाँत फोगट हिच्या कुडीचो पोस्टमार्टेम जाले उपरांत तिचे कुडीचेर घाय दिसून आयले. तशेंच तिणें उदकांतल्यान ड्रग्स घेतिल्ल्यान मरण अायिल्ल्याचें स्पश्ट जाल्लें. ते उपरांत पुलिसांनी खुनाचो गुन्यांव नोंद करून तपास सुरू केलो.
खून प्रकरणांतले मुखेल दुबावीत सुधीर सांगवान आनी सुखविंदर पाल सिंग हांची चवकशी सुरू आसा. तपासा खातीर गोंंय पुलिसांचो एक पंगड हरियाणांत वचून आयलो.
फोगट हिका घुंवळे वखदां जबरदस्तीन पियेवपाक दिवपाचो प्रकार कर्लीस बीच क्लबांत जाल्लो. हाका लागून धनी एडवीन नूनीस हांंचे विशीं दुबाव वाडलो.
भाजपा फुडारी तशेंच टिकटॉक स्टार सोनाली फोगट हिच्या दुबावीत मरणाचो तपास केंद्रीय गृह मंत्रालयान सीबीआय कडेन दिला.
मुख्यमंत्री डॉ. प्रमोद सावंत हांणी, फोगट खून प्रकरणाचो तपास सीबीआयन करचो, अशें पत्र बरयिल्लें. फोगट हिच्या कुटुंबा कडल्यान सीबीआय तपासाची मागणी जायत आसा. हाका लागून तपास सीबीआय कडेन दिवचो, अशें पत्र बरयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
