कदंब बशीचीं तीन सिटां गायब

तीन सिटां काडिल्ली कदंब बस.

भांगरभूंय | प्रतिनिधी

फाटल्या सिटार बशिल्ल्या प्रवाशांचें हाल

गोवा कॅन करतली कदंब म्हामंडळा कडेन कागाळ

वास्को: वास्को-मडगांव मार्गा वयली क्रमांक जीए 03 एक्स 0088 ह्या कदंब बशीच्या निमाण्या सिटा मुखा वयलीं तीन सिटां गायब जाल्ल्यान फाटल्या सिटार बशिल्ल्या प्रवाशांक व्हड गैरसोयीक सामकार वच्चें पडटा. ह्या प्रकरणांत गोवा कॅनान दखल घेतल्या. रोखडेच कदंब म्हामंडळाच्या वेवस्थापकी संचालकाक पत्र बरयतले अशें गोवा कॅनाचे समन्वयक रोलाण्ड मार्टीन्स हांणी सांगलें.

प्रवाशांक चडांत चड बरी सेवा मेळची हे खातीर यत्न करपा बदला कदंब म्हामंडळ लुकसाण कशें सोंसता हें सांगपाक धन्यताय मानपी कांय अधिकारी आसात.

वास्को-मडगांव मार्गा वयले कदंब बस क्रमांक जीए 03 एक्स 0088 ह्या बशीची तीन सिटां काडपा फाटलें कितेंय कारण आसूंक शकता. पूण निमाणच्या सिटार बसपी प्रवाशांची गैरसोय जातली हें लक्षांत घेवपाचे कश्ट कोणेच घेवंक नात.

तीन सिटां काडिल्ल्यान निमाणच्या सिटार बसपी प्रवाशांक प्रवास करतना व्हड सर्कस करची पडटा. ड्रायव्हरान ब्रेक मारले उपरांत आपलो तोल सांबाळपा खातीर त्या प्रवाशांक व्हड खबरदारी घेवची पडटा. धरपा खातीर कांयच नाशिल्ल्यान बशिल्ल्या सिटाक घट्ट धरून रावपाची धडपड करची पडटा. ही धडपड केली ना जाल्यार तांणी बशींत साश्टांग नमस्कार घालचो पडटलो. ह्या प्रकरणांत संबंदीत अधिकाऱ्यांनी प्रवाशांची गैरसोय कशी जाता हाची पळोवणी करपाची गरज आसा.