भांगरभूंय | प्रतिनिधी
-बुधवारच्यान दरेक स्थानकाचेर दुबावितांची चांचणीः संजय घाटे
पणजीः कदंब बशींच्या चालक आनी वाहकांच्या समुपदेशना सयत सोरो पिवपी चालक, वाहकांचे अल्कोहोल चांचणेक बुधवार पसून सुरवात जातली. दरेक बस स्थानकाचेर दुबावीत चालक आनी वाहकांची अल्मोमिटर वरवीं चांचणी करतले, अशी म्हायती कदंब म्हामंडळाचे वेवस्थापकीय संचालक संजय घाटे हांणी शेनवारा आमच्या प्रतिनिधी कडेन उलयतना दिली.
कदंब म्हामंडळाचे कांय चालक तशेंच वाहक ड्युटयेर आसतना सोऱ्याचे घुंवळेंत आशिल्ल्याचे हाचे पयलीं जायते खेपे उक्ताडार आयला. कांय दिसां पयलीं एक चालक सोऱ्याचे घुंवळेंत बस चलोवपाचे प्रकरण उक्ताडार आयले उपरांत मुख्यमंत्री डॉ. प्रमोद सावंत हांणीय ह्या प्रकरणाची गंभीर दखल घेतिल्ली.
ते उपरांत सबंदीत चालका सयत ताचो परवानोय निलंबीत केल्लो. फुडल्या काळांत अशें प्रकार आडावपा खातीर सगल्याच चालक, वाहकांचें समुपदेशन करपा सयत चालक, वाहकांची बशींत चडटना अल्कोमिटर वरवीं गुपीत पद्दतीन चांचणी करपाचो निर्णय लेगीत म्हामंडळाच्या संचालक मंडळाचे बसकेंत घेतला. ते प्रमाण बुधवारच्यान ही मोहीम सुरू करतले.
हे विशीं म्हामंडळान मागयिल्ले अल्कोमिटर मंगळार मेरेन म्हामंडळाक मेळटले. ते उपरांत दुसऱ्याच दिसा पसून अल्कोहोल चांचणेक सुरवात जातली.
सोरो पियेवन वाहन चलोवपी चालकांक लागून प्रवाशांच्या जिविताक धोको जावचो न्हय, हे खातीरूच म्हामंडळान अशा प्रकारचे खर निर्णय घेतला, अशेंय घाटे हांणी स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
