भांगरभूंय | प्रतिनिधी
गोवा मायल्साचेर बुकींग; बशींत क्यूआर कोडाची सुविधा
भांगरभूंय । सिद्धार्थ कांबळी
पणजीः डिजिटल तंत्रज्ञानाच्या माध्यमांतल्यान कदंबा बशी पांवड्या पांवड्यान कंडक्टरा बगर चलोवपाचो निर्णय म्हामंडळान घेतला. ते नदरेन गोवा मायल्स अॅपाच्या आदारान प्रवाशांक लायव्ह ट्रेकींग, बशीचें वेळापत्रक तशेंच तिकेट आदींच आरक्षीत करपाची सुविधा उपलब्ध करून दिल्या. ते भायर बशींनी क्यूआर कोड सुविधा उबलब्ध करून दितले.
गोंयांतले सर्वसामान्य लोक येरादारी खातीर चड करून कदंबा बशींचो वापर करतात. म्हामंडळ लुकसाणींत चलता, तरी लेगीत गांवगिऱ्या वाठारांतल्या लोकांक फायद्याक पडटा हे खातीर सरकार दर वर्सा म्हामंडळाचेर कोट्यांनी रुपया खर्च करता. पूण आतां कदंबा म्हामंडळान महसूल वाडीचेर भर दिला. ताचोच भाग म्हूण कंडक्टरा बगर बशी चलोवपाचे यत्न सुरू केल्यात, अशी म्हायती म्हामंडळाचे वेवस्थापकीय संचालक संजय घाटे हांणी ‘भांगरभूंय’ कडेन उलयतना दिली.
गोवा मायल्स अॅपाचेर बशीचें वेळापत्रक, ट्रॅकींग आनी तिकीट आरक्षीत करपाची वेवस्ता कदंबा म्हामंडळान केल्या. ताका लागून प्रवाशांक मोबायला वयल्यान तिकीट आरक्षीत करपाक मेळटली. तशेंच बशींत क्यूआर कोडाची वेवस्ता केल्ल्यान थंयच्यानूय तिकेट काडपाक मेळटली. म्हामंडळान पास वेवस्थाय ऑनलायन केल्या. जसजसो ह्या ऑनलायन माध्यमाचो वापर वाडटलो, तसतश्यो कदंबाच्यो बशी कंडक्टरा बगर चलतल्यो, अशें घाटे हांणी सांगलें.
सध्या कदंबा म्हामंडळाच्यो डिझॅलाचेर चलपी 437 जाल्यार 83 इलेक्ट्रीक अश्यो 520 बशी विवीध मार्गांचेर धांवतात. ह्या मार्गांचेर 1,467 बसस्टॉप आसात. पेटीएमान फाटल्या स म्हयन्यांत तांचे लेटनॉन काडल्यात. कदंबाच्या कंडक्टरांक पेटीएमा कडल्यान तिकेट मशिनां दिल्यात. ताका लागून हे फुडें गोवा मायल्स अॅपाच्या माध्यमांतल्यान बशीचें ट्रॅकींग करपाक मेळटलें तशेंच थंयच्यानूच तिकेट लेगीत काडपाक मेळटली, अशें घाटे हांणी सांगलें. कदंबा कडेन सुमार 700 कंटक्टर आसात. कदंबा बशी कंडक्टरा बगर धांवपाक लागले उपरांत त्या कंडक्टरांक निवृत्त जाय मेरेन विवीध बसस्टॅण्डांचेर तांकां तिकीट तपासणी तशेंच ऑनलायन माध्यमांची म्हायती दिवचे खातीर नेमणूक करतले. दर दिसा सुमार 78 हजार प्रवाशी कदंबांतल्यान प्रवास करतात. तातूंतले 36 हजार पासधारक आसतात. सध्या कंडक्टरांचेर जावपी खर्च उपरांत प्रवाशांचे सुविधे खातीर वापरतले. पासधारकांक 40 टक्के सूट दिवपाचो विचार आसा, अशें घाटे हांणी सांगलें. बशींत चालका वरवीं तिकेट दिवपाची वेवस्था करतले. ते खातीर चालकाक दरेके तिकेटी फाटल्यान 20 टक्के कमिशन दिवपाचोय विचार म्हामंडळ करता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
