भांगरभूंय | प्रतिनिधी
व्यंकटेश नायकः महाराष्ट्र सरकाराच्या अधिकाऱ्यांक योग्य उपाय येवजण करपाची सुचोवणी
भांगरभूंय । प्रतिनिधी
पेडणें: कडशी मोपा न्हंय पेडणें म्हालाची जीवनदायिनी आसा. सगळ्या जीव जंतूंक म्हणल्यार सजीव सृश्टीक जगपाचो अधिकार आसा, तेच तरेन न्हंयांचें संवर्धन जावप गरजेचें आसा. सरकाराच्या खंयच्याच प्रकल्पाक आमी विरोध करिनात. महाराष्ट्र सरकाराच्या उद्देगीक वसणूक मंडळान महाराष्ट्रांत जे सुवातेचेर बांद बांदून कडशी न्हंयेचें उदक घुंवडावपाचो यत्न केला तो योग्य न्हय, ते खातीर ही चळवळ आसा. अधिकाऱ्यांनी हो विशय वेवस्थीत मांडून ताचेर योग्य उपाय येवजण करची, अशी सुचोवणी पेडणें म्हाल विकास समितीचे अध्यक्ष व्यंकटेश नायक हांणी केली.
11 जानेवारीक महाराष्ट्र सरकाराच्या सगळ्या संबंदीत अधिकाऱ्यांची बसका डिंगणे पंचायत कार्यालयांत आयोजीत केल्ली. हे बसकेक सरपंच संजय डिंगणेंकार, पेडणें म्हाल विकास समितीचे उपाध्यक्ष गोपाळ शेट्ये, सचीव साईनाथ देसाय, जलसंपदा विभाग गोंयचे कार्यकारी अभियंते मंगले, उपविभागीय अभियंते मोहिते, कडशी न्हंय समन्वयक जयेश सावंत, मणेरी रानपाल संग्राम जितकार, रानरक्षक उमेस राणे, पंच लक्ष्मण मिस्त्री, संजय गांवकार, शैलेश गांवकार, गोविंद परब, विठोबा गांवकार, जयप्रकाश गांवकार, जीवा गांवकार, राजन गांवकार, रान विभागाचे मदन क्षीरसागर, रानपाल रान विभादाचे अनील मिस्त्री, तिनूय गांवचे सरपंच, पंच आनी 50 परस अदीक थळावे लोक हाजीर आशिल्ले.
कडशी न्हंयेचे उदक दुसरे वटेन घुंवडायलें आनी उदकाचें संकश्ट आयलें जाल्यार कशे तरेच्यो अडचणी आनी दुकळ निर्माण जातलो, न्हंय वाचोवपा खातीर कशे तरेच्यो सुचोवण्यो आनी समस्या मांडपाक मेळटल्यो हे खातीर जोडबसका आयोजीत केल्ली. हे बसकेंत व्यंकटेश नायक हांणी मांडिल्ले सगळे मुद्दे आनी केल्ल्यो सुचोवण्यो सगळ्या अधिकाऱ्यांनी शांततायेन आयकून घेतल्यो आनी तांची नोंद करून ताची फाटपुरवण करपाचो भरवसो दिलो.
व्यंकटेश नायक हांणी सांगलें, कडशी न्हंय वाचोवपा खातीर आतां सरकारानूय यत्न करचे. न्हंय आटली जाल्यार गांवांत दुकळ पडटलो, लोकवसती लेगीत काबार जातली. ही न्हंय वाचोवपा खातीर दरेकल्यान यत्न करचे. सिंधुद्र्ग वाठारांतल्यान जे कडशी न्हंयेचो उगम जाता ते न्हंये देगेर गोंया वांगडाच महाराष्ट्रांतले लेगीत आमचें खूबशीं सोयरीं- धायरी आसात. हे न्हंय ज्या वाठारांतल्यान व्हांवता, ते आडाळी न्हंयेचेर बांदिल्ल्या बांदाक लागून सकयल्या गांवांक उदकाचो उणाव जातलो. सध्या उदकाची पातळी खुबूच देंवल्या. हाका कारण महाराष्ट्र सरकारान बांदिल्लो बांद. न्हंयेच्या उदकाची पातळी वाडोवचे खातीर न्हंयेच्या उगमांतल्यो सगळ्यो सैमीक आनी मनशांनी तयार केल्ल्यो आडखळी पयस करच्यो. न्हंयेच्या उगमा कडेन उदक साठोवपा खातीर केल्लीं बांदकामां, न्हंयेक मेळपी ल्हान ल्हान व्हाळ हांची म्हायती दिवची. तशेंच न्हंयेक मेळपी सगळ्या व्हाळांतलो चिखल काडचो, धूप प्रतिबंधक उपाय येवजण करची, अश्यो साबार सुचोवण्यो नायक हांणी हे बसकेंत केल्यो. बसकेक हाजीर आशिल्ल्या सगळ्या सरपंचांनी, पंचांनी, लोकांनी ह्या वेळार विवीध सुचोवण्यो केल्यो. त्या सगळ्या सुचोवण्यांची नोंद महाराष्ट्र सरकाराच्या अधिकाऱ्यांनी केली. हो अहवाल जिल्होधिकाऱ्यांक धाडले उपरांत परतून एक जिल्होधिकाऱ्यां वांगडा बसका जातली. ते उपरांत कळशी मोपा न्हंयेचो जंय उगम जाता आनी तेरेखोल न्हंयेक मेळटा त्या पुराय वाठाराची पळोवणी करून ताचेर आनीक सुचोवण्यो आनी न्हंय संवर्धना खातीर जे जे यत्न करपाचे आसात ते सरकार आनी थळाव्या पंचायती, लोकां वतीन करपाचो भरवसो अधिकाऱ्यांनी दिली.
झाडां मारल्यार खर कारवायः क्षीरसागर
न्हंये पासून 20 मिटर अंतराचेर आशिल्लें एकूय झाड आपूण मारचो ना आनी एकाद्यान तें मारलें जाल्यार ते सुवातेचेर आपूण नवो रोपो लायतलो, ही जापसालदारकी दरेकल्यान घेवची. झाडांक लागून न्हंयेदेगे वयलीं माती घट उरता. झाड मारल्यार थंयचे मातयेची धूप जावन ती थेट उदकांत वता. न्हंयेचें पात्र वाडोवन हुंवार येवपाक शकता. ताका लागून मनशान न्हंयेचेर हाडिल्लीं संकश्टां आनी केल्लीं अतिक्रमणां हांचेर नियंत्रण दवरून दरेके न्हंयेचो सांबाळ करचो. कडशी न्हंयेदेगे वयल्या सगळ्या झाडांचो आमी सांबाळ करतले. जे कोण झाडां मारतले, तांचेर खर कारवाय करतले, अशी शिटकावणी राम विभागाचे मदन क्षीरसागर हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
