भांगरभूंय | प्रतिनिधी
प्रमोद सावंत सरकारांतल्या दोग मंत्र्यां मदीं सध्या ‘हांव सांगता, तूं आयक’ ह्या गोंयकारांच्या मूळ स्वभावाक धरून शाब्दीक झूज पेटलां. तें खंय मेरेन पावतलें तें खबर ना, मात ताका लागून गोंयकारांची मनरिजवण जावपाक भरपूर वाव आसा. प्रस्न आसा तो कला अकादमी इमारतीच्या नूतनीकरणाचो. तें करपाक कोणाचीच हरकत ना. मात, जे पद्दतीन ह्या कामाचें कंत्राट दिलां तो सध्या कळीचो मुद्दो जाला. ज्या खात्या खाला अकादमी येता, त्या कला, संस्कृती खात्याचे मंत्री गोविंद गावडे हांणी टेकटॉन कंपनीक सुमार 50 कोटी रुपयाचें हें नूतनीकरण करपाचें कंत्राट दिलां, ताचे वयल्यान सध्या ‘चिखलकालो’ चलता. (गोविंदबाब म्हणटात, कंत्राट दिता बांदकाम खातें. बांदकाम मंत्री निलेश काब्राल म्हणटात तें म्हज्या काळांत दिवंक ना.) केंद्रीय भौशीक बांदकाम खात्याच्या (सीपीडब्ल्यूडी) मॅन्युएला प्रमाण हें कंत्राट दिवंक ना, असो हें प्रकरण न्यायालयांत व्हरपी गोवा फॉरवर्डाचो आरोप. निविदा बी काडिनास्तना फकत मंत्रिमंडळाची मान्यताय घेवन हें कंत्राट दिलां अशेंय विरोधक म्हणटात. तर तें सीबीडब्ल्यू मॅन्युएला प्रमाणूच दिलां, अशें गोविंदबाबाचें म्हणणें. सध्या हें प्रकरण न्यायालयांत आसतना गोविंदबाब आनी निलेशबाब एकमेकांचीं शिंगा ओडपाक लागल्यात आनी गोवा फॉरवर्डाचे सर्वेसर्वा विजय सरदेसाय, दुर्गादास कामत आनी खुद्द भाजपाचे म्हणयारे सावियो रॉड्रिग्ज बोवाळ घालून ह्या धिरयांक बळगें दितना दिसतात.
गोविंदबाब जें कितें उलोवपाचें तें ‘झेतान शिवाजी शेतांत उबो’ ह्या थाटांत उलयतात. नूतनीकरण कंत्राट प्रकरण आंगार येता हें पळोवन ते गडबडल्यात, हें फाटल्या विधानसभा सत्रांत जाणवलें. हें कंत्राट सीपीडब्ल्यूडीच्या मॅन्युएला प्रमाण दिलां काय ना, ह्या सरदेसाय हांच्या साद्या प्रश्नाक तितलीच सादी जाप दिवपाचें सोडून ते मुघल राजा शहाजनाक बचाव करपाक घेवन आयले आनी घुस्पले. ताजमहाल बांदपाक शहाजनान कंत्राट दिल्लें जाल्यार तो इतलो तेंप तिगचो नाशिल्लो अशें तांणी सरदेसाय हांकां सांगलें. शहाजनहान हो मुघल राजवटींतलो हुकूमशहा. ती राजवट सोंपून आतां प्रजासत्ताक भारतांत लोकशाय शासन प्रणाली आसा. जें कितें करपाक जाय तें हे प्रणालींतल्या कायदे, नेमां प्रमाण हें सिव्हिल इंजिनीयर आशिल्ल्या गोविंदबाबाक कशें कळ्ळें ना? तांणी शहाजना संबंदीत डायलॉग मारलो खरो, पूण अशें करतना ‘कंत्राट दिवन कामां करतात तीं तिगनात’ अशें अप्रत्यक्षपणान मानून लेगीत घेतलें. कंत्राट प्रकरण ल्हवू ल्हवू करून गळ्या मेरेन पाविल्ल्यान गोविंदबाबान आतां बांदकाम खात्याक मदीं हाडून नीलेश काब्राल हांकां खुबळावन घाला, अशें राजकी निरीक्षक उलोवपाक लागल्यात. कंत्राटा कडेन संबंदीत फायली मागयल्यात, अशें काब्राल सांगतात. रोखडेंच ‘दूध का दूध, पानी का पानी’
जावचें.
कला अकादमीची वास्तूरचणूक संवसारीक नामनेचे गोंयचे पूत चार्ल्स कुरैय्या हांणी केल्या. दर्यादेग वाठारांतलें खारें उदक आनी खारट हवामानाक लागून बांदकाम दोश तयार जावप सभावीक. तो कुरैय्या हांचो दोश न्हय. तांणी केल्ले अकादमी इमारतीचे रचणुकेंत बदल करिनास्तना नूतनीकरणाचें काम जावचें अशी गोंयच्या कलाकारांची मागणी आशिल्ली. चार्ल्स कुरैय्या फावंडेशनाच्या सल्ल्यान हें काम करचें, अशीय तांणी सुचोवणी केल्ली. उपरांत, कोरिया फावंडेशन सरकाराक सांगपी कोण, अशें मतप्रदर्शन करून गोविंदबाबान सगळ्यांचो राग ओडून घेतिल्लो. कांय कोटी रुपयांत नूतनीकरण करून घेवप शक्य आसतना ते खातीर 50 कोटी रुपयांचें कंत्राट काडून तें नामांकन तत्वाचेर टेकटॉनाक दिवपाची शिफारस कला आनी संस्कृती खात्यान (म्हणल्यार मंत्री गोविंद गावडे हांणी) केल्ली अशें काब्राल हांणी म्हणलां. अव्वाच्या सव्वा खर्च दाखोवन हें नूतनीकरण कंत्राट निविदा काडिनासतना दिवप हाचे फाटले नेमकें बीजगणित कितें, असो प्रस्न सगळ्यांकूच पडला. न्यायालय ह्या कंत्राट प्रकरणाचो सोक्षमोक्ष लायतलें तेन्ना ताची जाप मेळत व्हय?
मुख्यमंत्री डाॅ. प्रमोद सावंत हांणी मंत्रीमंडळ फेररचणुकेचो सध्या तरी विचार ना. दिल्लींत कांय चर्चा जावंक ना, अशें स्पश्ट केलां खरें, पूण काँग्रेस सोडून भाजपांत आयिल्ल्यांक मंत्रीपद दिवपाक एकल्या- दोगांची होमकुंडांत आहुती दिवचीच पडटली. त्या समिधां मदीं ‘कंत्राटाय स्वाहा’ चीय एक समिधा आसपाची शक्यताय न्हयकारपाक येना. दोन खात्यां मदीं ह्यो धिरयो ताकाच लागून चालू नात मूं?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.