भांगरभूंय | प्रतिनिधी
शिवोलीः म्हादय विशया वयल्यान ओशेल ग्रामसभेंत केंद्र आनी राज्य सरकारांचो खर निशेध केलो.
ओशेल पंचायतीची ग्रामसभा पंचायत सभाघरांत आयतरा सकाळीं घेतिल्ली. हे ग्रामसभेक सरपंच प्रवीण कोचरेकार, उपसरपंच रेषल हरमलकार, पंच वैभव मयेंकार, शोभावती चोडणकार, सिद्धी शिरोडकार, राजू बाणावलीकार, प्राप्ती कोचरेकार आनी थळावे लोक हाजीर आशिल्ले.
म्हादयचो विशय गौरेश मांद्रेंकार आनी गौरेश आगरवाडेकार हांणी मांडलो. केंद्रांतल्या तशेंच गोंयांतल्या भाजपा सरकारान लोकांचो विस्वासघात केला, असो आरोप ग्रामसभेंत केलो. केंद्रीय गृहमंत्री अमीत शाह हांच्या विधानाचो ग्रामसभेंत निशेध केलो. तशेंच केंद्र आनी राज्य सरकाराचो निशेध करपी थाराव लेगीत मंजूर केलो.
गांवांतल्या विवीध समस्यांचेर चर्चा करतना गांवांतलो कोयर एकठांय करचे खातीर कर लागू करपाचो निर्णय घेतलो. विवीध वाठारांतल्या रस्त्यांचेर स्पीडब्रेकर घालपाची मागणी केली. गांवांतल्या उदरगतीच्या कामां विशीं फाटपुरवण कित्याक करूंक ना, असोय प्रस्न ग्रामसभेंत उपस्थीत केलो.
पंचायत सचिवाच्या कामचुकारपणाक लागून खूबशीं कामां आडावल्यांत, असो दावो सरपंचान केलो. ताका लागून त्या सचिवाची डिसेंबरांत बदली केल्या. नव्यान रुजू जाल्ल्या सचिवा कडल्यान आडावल्लीं कामां पुराय करतले, अशी म्हायती सरपंचान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
