भांगरभूंय | प्रतिनिधी
जयेश नायकः ओशेलांतल्या राम तारी वाड्याचेर 22 घरांनी चवथीक
शंकर- पार्वतीची पुजा करतात. ही परंपरा फाटल्या कितल्याशाच वर्सां सावन चलत आयल्या. ह्या 22 घरांतल्या 17 घरांनी शंकर- पार्वती वांगडा गणपतीचीय पुजा करतात, पूण पांच घरांनी मात फक्त शंकर- पार्वतीचीच पुजा करतात. ओशालांतल्या त्या 17 घरांनी अंदूं देड दिसाची चवथ मनयली. थंय एक वर्स देड दीस जाल्यार फुडल्या वर्सा पांच दीस अशी परंपरा आसा. ह्या घरांनी सुरवेक शंकर- पार्वतीची पुजा करताले, पूण उपरांत ल्हवू ल्हवू शंकर- पार्वती वांगडा गणपतीचीय पुजा करपाक सुरवात केल्या.
चवथीक शंकर- पार्वतीची पुजा करपाची परंपरा केन्नाच्यान सुरू जाली हें आमकां कोणाकूच खबर ना. पूण आमी ही परंपरा तिगोवन दवरल्या. ह्या वाड्याचेर ही परंपरा फक्त चोडणकार कुटुंबां मदीं आसा. ओशेल गांवा भायर राबित्याक आशिल्ले हेर चोडणकार कुटुंब लेगीत चवथीक शंकर- पार्वतीची पुजा करून परंपरा तिगोवन दवरपाक हातभार लायतात.
आदीं आमी फक्त शंकर- पार्वतीची पुजा करताले. 28 वर्सां आदीं औदुंबर चोडणकार, सूर्यकांत चोडणकार आनी आपल्या कुटुंबान मेळून तीन घरांनी शंकर- पार्वती वांगडा गणपती पुजपाक सुरवात केली. ते उपरांत हेर कांय कुटुंबांनी आमकां तेंको दीत शंकर- पार्वती वांगडा गणपती पुजेक लायलो. मदल्या काळांत एका कुटुंबान लक्ष्मीनारायणाची पुजा करपाक सुरवात केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
