भांगरभूंय | प्रतिनिधी
पणजी ः ओबीसी महासंघ फाटलीं कितलींशींच वर्सा राष्ट्रीय ओबीसी महासंघ लोकांच्यो मागण्यो सरकारा मुखार मांडटा. पूण सरकार हाचे कडेन दुर्लक्ष करून पुराय ओबीसी समाजाचेर एके तरेन अन्याय करता अशें राष्ट्रीय ओबीसी महासंघाचे अध्यक्ष मधू नायक हांणी पत्रकार परिशदेंत सांगलें. ह्या वेळार ओबीसी महासंघाचे हेर वांगडीय हाजीर आसले.
ओबीसी महासंघाचे वतीन गोंय वैजकी महाविद्यालयांत एमबीबीएस पदवी खातीर सुवातांचें आरक्षण, दंत वैजकी महाविद्यालय सुवातां खातीर आरक्षण, सरकारी नोकरेंत पदा खातीर आरक्षण, सरकारी पदार आशिल्ल्यांक रोखडीच बडटी, ओबीसी कल्याण मंत्रीपद तशेंच हेर विवीध मागण्यो आसात. हे विशीं मुख्यमंत्री तशेंच सगल्या मंत्र्यांक आनी आमदारांक निवेदन दिलां पूण आमच्यो मागण्यो मान्य जायनात अशें मधू नायक हांणी सांगलें.
गोंयांत ओबीसी लोकांचो आंकडो खूब आसा. अशें आसतनाय तांकां योग्य मान मेळना. तांचे खातीर आशिल्लें आरक्षण मेळना. शिक्षण, भलायकी, राजकारण, सरकारी नोकरी अश्या विंगडविंगड मळार ह्या लोकांक आरक्षण मेळप हो अधिकार आसा. पूण लोकसंख्ये प्रमाण गोंयांत तशें आरक्षण दिनात. ह्या आरक्षणांत वाड करूंक जाय. जे वरवीं सगल्या ओबीसी समाजाक न्याय मेळटलो. हो विशय आमी लावून धरतले आनी सगल्या मंत्र्यांक आनी आमदारांक निवेदन दितले अशेंय मधू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
