ऑस्ट्रेलिये आडचे वन-डे माळे खातीर भारतीय पंगड जाहीर पयले मॅचीं खातीर हार्दिक पंड्या  कॅप्टन 

भांगरभूंय | प्रतिनिधी

खबरां संस्था
नवी दिल्लीः ऑस्ट्रेलिये आडचे 3 मॅचींचे वन-डे माळे खातीर भारतीय क्रिकेट नियामक मंडळान (बीसीसीआय) भारतीय पंगडाची घोशणा केली. रोहीत शर्मा वैयक्तीक कारणां लागून पयले वन-डेंत पंगडाचें फुडारपण करचो ना. ताचे सुवातेर हार्दिक पंड्या पंगडाचें फुडारपण करतलो.
केएल राहुल, विराट कोहली आनी हेर नामनेचे खेळगडी  पंगडांत आसात. भारतीय पंगडअदूं आतां मेरेन श्रीलंका आनी न्यूझिलंडा आड वन-डे माळो खेळ्ळा. दोनूय माळेंत भारतीय पंगडान शानदार जैत मेळयल्लें. ऑस्ट्रेलिये आडचे माळेंत रोहीत शर्मा निमण्या दोन  मॅचींत पंगडांत येतलो.
शुभमन गील आनी विराट कोहली वांगडा श्रेयस अय्यर लेगीत पंगडांत आसात. अश्टतासी खेळगड्यां विशीं सांगपाचें जाल्यार हार्दिक पंड्या वांगडा टॅस्ट मॅचींत बरी कामगिरी करपी रवींद्र ज़डेजान वन-डे माळेत परत आयलां. वॉशिंग्टन सुंदर, अक्षर पटेल आनी शार्दुल ठाकूर हांचो पंगडांत आसपाव आसा. कुलदीप यादव,  युजवेंद्रसिंग चहल, फास्ट बॉलर मोहम्मद शमी, मोहम्मद सिराज, उमरान मलीक आनी जयदेव उनाडकट हांचो पर्याय पंगडा कडेन आसतलो.
भारत आनी ऑस्ट्रेलिये मदली पयली वन-डे 17 मार्चाक मुंबय, दुसरी मॅट 19 मार्चाक विशाखापट्टणमांत आनी तिसरी आनी निमणी वन-डे 22 मार्चाक चेन्नय जातली.
वन-डे माळे खातीर भारतीय पंगडः  रोहित शर्मा (कॅप्टन), शुबमन गील, विराट कोहली, श्रेयस अय्यर, सूर्यकुमार यादव, केएल राहुल, इशान किशन (विकेटकीपर ), हार्दिक पंड्या (व्हाईस कॅप्टन), रवींद्र जडेजा, कुलदीप यादव, वॉशिंग्टन सुंदर, युजवेंद्र चहल, मोहम्मद शमी, मोहम्मद सिराज, उमरान मलिक, शार्दुल ठाकूर, अक्षर पटेल आनी जयदेव उनाडकट.