भांगरभूंय | प्रतिनिधी
अनुकंपा तत्वाचेर वट्ट 12 जाणांक मेळ्ळो लाव
पणजी: सरकारी सेवा दिता आसतना (ऑन ड्युटी) अपघाती मरण आयिल्ल्या व्यक्तीच्या कुटुंबातल्या वांगड्यांक अनुकंपा तत्वाचेर नेमणूक पत्रां काल (मंगळारा) मुख्यमंत्री डॉ. प्रमोद सावंत हांचे हस्तुकीं भेटयलीं. वट्ट 12 जाणांक मुख्यमंत्र्या हस्तुकीं ही नेमणूक पत्रां दिलीं. सरकारा कडेन वट्ट 499 अश्यो कागाळी पडून आसात. सगल्यांक अशे तरेन नेमणूक पत्रां दितले.
खूबशा कर्मचाऱ्यांक सरकारी सेवा दिता आसतना मरण येता. अशा वेळार तांच्या कुटुंबांतल्या वांगड्यांक व्हड धक्को सोंसचो पडटा. वीज खात्यांत, पुलीस खात्यांत तशेंच हेर खात्यांनी लेगीत खूबशा जाणांक ‘ऑन ड्युटी’ आसतना मरण आयलां. अशा कुटुंबांतले व्यक्तीक ताकतिकेन अनुकंपा तत्वाचेर नेमणूक पत्रां मेळप गरजेचीं आसात. भाजपा सरकारान हातूंत फुडाकार घेतला आनी कांय जाणांक चवथी पयलीं हीं नेमणूक पत्रां दिल्यांत. उरिल्ल्या सगल्यांक टप्प्याटप्प्यान नेमणूक पत्रां दितले अशें मुख्यमंत्री डॉ. प्रमोद सावंत हांणी सांगलें.
चवथीचे उमेदींत आनीक भर पडची हे खातीर खूबशो येवजण्यो लाभार्थ्यांक चवथी पयलीं दिल्यांत. खूबशा येवजण्यांचे पयशे ह्या लाभार्थ्यांक मेळत आसात. दरेकाचें घर खुशालकायेन भरचें होच भाजपा सरकाराचो हेतू आसा. दरेक चवथ उमेदीन मनोवची. फाटले आठ दीस आमी विवीध येवजण्यांचे पयशे दिल्यात. तशेंच खूबशा लाभार्थ्यांक ताचो लाव जाला अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
