भांगरभूंय | प्रतिनिधी
म्हापशें पालिकेची वित्त आयोगा मुखार मागणी
म्हापशें: पालिकेक सद्या निधीचो उणाव जाणवता. सरकारान थांबयिल्ले ऑक्ट्रोय कर (जकात) अनुदान परतून सुरू करचें, हे मागणे सयत विवीध मुद्दे तृतीय गोंय राज्य वित्त आयोगा मुखार मांडिल्ल्याची म्हायती म्हापशेंच्यो नगराध्यक्षा शुभांगी वायंगणकार हांणी दिली.
तृतीय गोंय राज्य वित्त आयोगाचे अध्यक्ष दौलत हवालदार हांचे सयत वांगडी सचीव आनी हेर वांगड्यांनी शुक्रारा म्हापशें पालिकेक भेट दिवन पालिकेच्या अर्थीक स्थितीचो नियाळ घेतलो. राज्याच्या अनुदानाचो विनियोग कसो जाता हाची पळोवणी केली.
हे भेटी वेळार वित्त आयोगाच्या पदाधिकाऱ्यांनी नगराध्यक्षा शुभांगी वायंगणकार, उपनगराध्यक्ष चंद्रशेखर बेनकार, मुख्याधिकारी अमितेश शिरवयकार आनी हेर अधिकारी आनी नगरसेवकां कडेन संवाद सादलो.
पालिकेचें उत्पन्न आनी खर्चा सयत अर्थीक परिस्थिती, कोयर वेवस्थापना सयत विवीध प्रकल्प, विवीध निधींतल्यान हातांत घेतिल्ले प्रकल्प, प्रशासकी खर्च भागोवप हाचे सयत कर्मचाऱ्यांचो पगार आनी विवीध अडचणीं विशींचे पॉवर पॉयंट प्रेझेंटेशन ह्या वेळार पालिके वतीन सादर केलें.
तशेंच आयोगाच्या अधिकाऱ्यांनी पालिकेच्या कुचेली हांगासरल्या कोयरा प्रक्रिया प्रकल्पाक भेट दिवन पळोवणी केली.
आमी बसकेंत पालिकेची अर्थीक स्थिती मांडली आनी ऑक्ट्रोय कराचो मुद्दो उपस्थीत केलो. हो निधी थांबयला, तो परतून सुरू करचो अशी विनंती केली. ह्या वेळार आयोगाच्या अध्यक्षांनी ह्या समस्यां कडेन लक्ष दिवं, तशेंच अहवालांत ऑक्ट्रोय कराचो उल्लेख करून सरकारा कडेन सादर करपाचें आस्वासन तांणी दिल्ल्याचें नगराध्यक्षा शुभांगी वायंगणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
