भांगरभूंय | प्रतिनिधी
मुंबय, खबरां संस्था ः अपघातांचो आंकडो वाडपा फाटलें कारण म्हणल्यार वाहन चालक चड करून मोबायल फोनाचेर उलयतात वा मोबायल फोन वापरतात. आतां महाराष्ट्र येरादारी म्हामंडळान मोबायल फोन वापरिल्ल्यान अशे अपघात जावचे न्हय म्हणून वाहन चालकां खातीर नवो नेम केला.
हालींच्या काळांत एसटी बस चालकांनी गाडी चलयतना मोबायल फोन वापरपाच्यो जायत्यो घडणुको घडल्यात. हाचे व्हिडियो सोशल मिडियाचेर व्हायरल जाल्ल्यान लोकांची खर प्रतिक्रिया आयल्या. परत परत मोबायल फोन वापरचे न्हय अशी सुचोवणी दिल्या उपरांत लेगीत अशें घडटा ही गंभीर गजाल आशिल्ल्यांचें महाराष्ट्र येरादारी म्हामंडळान सांगलां.
मोटार वाहन कायद्या प्रमाण गाडी चलयतना मोबायल फोन वापरपाक बंदी आसा. एसटी प्रवासाक सुरक्षीत प्रवास अशें म्हण्टात. हो दावो घटमूट करपा खातीर वाहन चालकांनी वाहन चलोवपाचे नेम खरपणान पाळपाची गरज आसा अशेंय येरादारी म्हामंडळान सांगलां.
गाडी चलयतना मोबायल फोन वापरपाक बंदी आसा. ड्रायव्हरां कडेन मोबायल फोन आसल्यार तो कंडक्टरा कडेन दिवचो अशेंय सांगलां. कंडक्टर नासल्यार ड्रायव्हरान आपलो मोबायल पोतयेंत दवरचो. परिपत्रकांत फकत मोबायल फोन न्हय तर हेडफोन आनी ब्लूटूथ वापरचें न्हय अशी सुचोवणी दिल्या. बस चालकांक गाडी चलयतना मोबायल फोन वापरपाचेर बंदी केल्यार अपघात नियंत्रीत करपाक आनी कागाळी आडावंक मजत जातली अशी आस्त वेवस्थापकीय संचालकान उक्तायल्या.
वाहन चालकांनी बशी चलयतना मोबायलाचो वापर करचो न्हय अशें म्हामंडळान परिपत्रक जारी केलां. ड्रायव्हर मोबायल फोन वापरता अशें दिसल्यार ताचेर खर कारवाय करतले अशीय शिटकावणी महाराष्ट्र येरादारी म्हामंडळान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
