भांगरभूंय | प्रतिनिधी
बार्देसांत चड प्रकरणां, सांग्यार 73 सरकारी भूंयखंडांची बेकायदो विक्री
भांगरभूंय I प्रतिनिधी
पणजी : बेकायदो जमीन बळकावप प्रकरणाच्या तपासा खातीर सरकारान स्थापन केल्ल्या खासा तपास पंगडान (एसआयटी) आतां मेरेन बनावट कागदपत्रां तयार करून 100 भूखंडांची परस्पर विक्री केल्ले प्रकरणांत 35 गुन्यांव नोंद केल्यात. जमीन बळकावप प्रकरणांत लोकांच्यो कागाळी येत आसात, अशी म्हायती गुन्यांव फांट्याचे पुलीस अधिक्षक निधीन वाल्सन हांणी दिली.
तपास सुरू आशिल्ल्या 35 प्रकरणांतल्यान 7 प्रकरणांनी एसआयटीन गुन्यांव नोंद केल्यात. जाल्यार 28 गुन्यांवांचीं प्रकरणां हेर फांट्या कडल्यान गुन्यांव फांट्या कडेन वर्ग जाल्यात.
बेकायदो जमीन विक्री वा खरेदीचो तपास एसआयटी कडेन सोंपयल्या, अशें पुलीस अधिक्षक निधीन वाल्सन हांणी सांगलें.
ज्यो जमनी पडीक आसात, आनी तांचे धनी विदेशांत रावतात अशांच्यो जमनी बानवट कागदपत्रां तयार करून विकपाच्यो प्रकार घडल्यात. जमनीचो धनी विदेशांत आशिल्ल्यान अशा जमनींचेर नदर दवरपी वा ताची वासपूस करपी कोणूच नाशिल्ल्यान अशें प्रकार घडटात. जे लोक गोंया भायर रावतात, तांणी आपल्या जमनीची कागदपत्रां तपासप गरजेचें. कागदपत्रां तपासून तांणी आपल्या जमनी विशीं खात्री करून घेवपाक जाय. तशेंच जमीन बेकायदो परस्पर विकल्या जाल्यार हे विशीं कागाळ करची, अशें आवाहन पुलीस अधिक्षक निधीन वाल्सन हांणी सांगलें.
खासा तपास पंगडान (एसआयटी) बेकायदो जमीन बळकावप प्रकरणांत आतां मेरेन 9 जाणांक अटक केल्या. हातूंतल्या 8 जाणांची जामिनाचेर सुटका जाल्या. आयतारा बंगळुरा अटक केल्ली अंजुम शेख पुलीस बंदखणींत आसा. हणजुण्यां बेकायदो पद्दतीन तिणें मालकी हक्क दुसऱ्याच्या नांवार केले. जामीन हो तांचो अधिकार आसा. तांची जामिनाचेर सुटका जाली आसली तरी तपासाक सहकार्य करपाची अट न्यायालयान घातल्या. जामिनाच्या अटींचे पाळो दिलो ना वा तपासांत सहकार्य केले ना, जाल्यार एसआयटी जामीन रद्द करपा खातीर अर्ज करतली. परतून अटके खातीर अर्ज करपाची मेकळीक कायद्या प्रमाण आसा, अशें वाल्सन हांणी सांगलें.
आतां मेरेन दोगां सरकारी कर्मचाऱ्यांक बेकायदो जमीन बळकावप प्रकरणांत अटक जाल्या. दोगांयची जामिनाचेर सुटका जाल्या. आनीक सरकारी कर्मचाऱ्यांचो आस्पाव आशिल्याचे स्पश्ट जाल्यार तांचेर खर कारवाय जातली, अशी शिटकावणी वाल्सन हांणी दिली. रेकॉर्ड अटेंडंट धिरेश नायक हाका सगल्यांत पयलीं अटक जाल्ली.
जमीन बळकावप प्रकरणांत सगल्यांत पयलीं विक्रांत शेट्टी (आसगांव) हाका 18 जूनाक अटक जाल्ली. सुनील कुमार (तिस्क उसगांव), स्टीवन डिसोझा (दोनापावल), मोहम्मद शफी हांकां उपरांत अटक जाल्ली.
राज्यांत मोट्या प्रमाणांत बेकायदा जमनींची विक्री जाता. फाटलीं बरीच वर्सां हो प्रकार सुरू आसा. मालकी हक्क नाशिल्याे जमनी मोट्या प्रमाणांत बळकायल्यात. हाचो तपास करपा खातीर सरकारान 15 जूनाक एसआयटी स्थापन केल्या. गुन्यांव फांट्याचे पुलीस अधिक्षक निधीन वाल्सन हांचे मार्गदर्शना खाला तपास सुरू आसा. दक्षीण गोंयची उपजिल्होधिकारी स्नेहल प्रभू, पुलीस उपअधिक्षक ब्राझ मिनेझीस, पुलीस निरिक्षक सतीश गावडे, पुलीस निरिक्षक निलेश शिरोडकार हे एसआयटीचे वांगडी आसात. तशेंचर पुराभिलेख खातें आनी नोंदणी कार्यालयाचो एक प्रतिनिधी एसआयटी पंगडांत आसा.
सांग्यार 73 सरकारी भूखंड परस्पर विकले
सरकारी जमनींची लेगीत बेकायदाे विक्री जाल्या. हे विशीे सांगेे मामलेदारांनी कागाळ नोंद करून गुन्याेव नोंद करपाक सांगलां. सांग्यार 73 सरकारी जमनींची विक्री जाल्या. 2013 सावन विक्रीची प्रक्रिया सुरू आसली. आयआयटी खातीर सांगेंच्या सरकारी जमनीचें मेजमाप सुरू आसा. हे जागेचो आस्पाव आसा काय? हे विशीं आतांच सांगपाक जावचे ना, अशी जाप निधीन वाल्सन हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
