भांगरभूंय | प्रतिनिधी
नीळकंठ हळर्णकार: अधिकारी करतले तपासणी
पणजी: नुस्तेमारी खातीर ट्रॉलर दर्यांत वच्चें पयलीं नुस्तेमारी खात्याचे अधिकारी ट्रॉलरांची तपासणी करतले. तातूंत एलईडी नुस्तेमारी खातीर लागपी कसलींय उपकरणां नाशिल्ल्याची खात्री जाले उपरांत खात्या वतीन ट्रॉलरांक पास दितले. पास मेळ्ळे उपरांतूच ट्रॉलरांक दर्यांत वचपाची परवानगी आसतली अशें नुस्तेमारी मंत्री नीळकंठ हळर्णकार हांणी सांगलें.
फाटल्या कांय वर्सांत गोंयांत व्हड प्रमणांत एलईडी वरवीं नुस्तेमारी करतात. ताका लागून दर्यांत नुस्त्यांक मरण येवपाचे प्रकार वाडिल्ल्यान नुस्त्याचें उत्पन्न उणें जायत आसा. हो विशय कांय दिसां पयलीं मुंबय उच्च न्यायालयाच्या गोंय खंडपिठांत पाविल्लो. ताचेर सुनावणी घेवन न्यायालयान नुस्तेमारी खातीर ट्रॉलर वा बोटी दर्यांत वच्चे पयलीं तांची तपासणी करची. तातूंत एलईडी, बूल ट्रॉलींग वा पेअर ट्राॅलिंगाची कसलींच उपकरणां नाशिल्ल्याची खात्री करून घेवची आनी उपरांतूच तांकां दर्यांत वचपाची परवानगी दिवची अशें निर्देश नुस्तेमारी खातें तशेंच दर्यादेगे वयल्या पुलिसांक दिल्ले.
न्यायालयाच्या निर्देशा प्रमाण ह्या गजालींची खातरजमा जाले उपरांत ट्रॉलर तशेंच बोटींक पास दिवन दर्यांत सोडपाक खात्यान निश्चीत केलां.
खात्याची नदर चुकोवन एखादो ट्रॉलर वा बोट दर्यांत गेल्ली दिसून आयल्यार ताचेर कारवाय करपाचो पुराय अधिकार दर्यादेग पुलिसांक दिला अशेंय मंत्री नीळकंठ हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
