भांगरभूंय | प्रतिनिधी
पणजी : मुंबय जावपी इंडिया मॅरीटायम सप्तका निमतान मुरगांव बंदर प्राधिकरण (एमपीए) 3 हजार कोटी रुपयांच्यो 24 समजिकाय कबलाती करतले. हातूंत एमपीएंत अतिरिक्त 2 मेगा वॉट्ट सौर उर्जा प्रकल्प आनी बर्थ नं. 9 च्या विस्तारीकरणाचो आस्पाव आसा, अशी म्हायती एमपीएचे अध्यक्ष एन. विनोदकुमार हांणी दिली.
पणजे घेतिल्ले पत्रकार परिशदेंत भारतीय मॅरीटायम सप्तका विशीं म्हायती दितना एन. विनोदकुमार उलयताले. ह्या वेळार एमपीएचे उपाध्यक्ष विनायक राव आनी हेर मानेस्त हजर आशिल्ले.
27 ते 31 ऑक्टोबर मजगती मुंबय जावपी मॅरीटायम सप्तक कार्यावळ आनी रुपरेशा कशी आसतली हे विशीं म्हायती विनोदकुमार हांणी दिली.
मॅरीटायम सप्तकांत एमपीए एक खाशेलें सत्र घडोवन हाडटले. हे निमतान एमपीए 3 हजार कोटी रुपयांच्यो 24 समजिकाय कबलातीचेर सयो करतले. हातूंतल्या कांय कबलातींक मान्यताय मेळ्ळ्या. हातूंत एमपीएंत अतिरिक्त 2 मेगा वॉट्ट तांकीचे सॉलर प्लांट बसोवपाचो प्रस्ताव आसा. हे प्लांट बसयले उपरांत एमपीएंत सौर उर्जेची तांक 5 मॅगा वॉटाचेर पावतली, अशें विनोदकुमार हांणी सांगलें.
ते भायर एमपीएंत आशिल्लो बर्थ नं. 9 चें विस्तारीकरण करपाचो प्रस्ताव एमओयू भितर आसा. ह्या बर्थाची तांक आमकां वाडोवपाक जाय. आमी ह्या बर्थाची लांबाय 350 मिटर मेरेन वाडोवपाचे आसात. तशेंच न्हंय म्हायती यंत्रणा आनी व्हॅसल ट्रेकर ह्या तंत्रज्ञानाचो हातूंत आस्पाव आसा, अशें विनोदकुमार हांणी म्हणलें.
सोलर प्रक्रिया प्रकल्प उबारपी एमपीए हें देशांतलें पयलें हरीत बंदर आसा. सध्या 3 मॅगा वोट सौर उर्जा एमपीए तयार करता आनी 100 टक्के हाचो वापर जाता. पूण आतां क्रूझ टर्मिनल एकदां चालीक लागले उपरांत आमकां अतिरिक्त उर्जेची गरज लागतली. देखून अतिरिक्त 2 मॅगा वॉटट् प्लांट चालीक लायतले, अशी म्हायती विनोदकुमार हांणी दिली.
लायट हावसांचो पर्यटन नदरेन जातली उदरगत
पयली लायट हावस हें बोटींचे येरादारी खातीर म्हत्वाची भुमिका करताले. पूण आतां तांची तितली गरज नाशिल्ल्यान ह्य लायट हावसांचो पर्यटना खातीर उदरगत कशी करप हाची चर्चा ह्या सप्तकात जातली. गोंयांत कांपालार आशिल्ल्या लायट हावसाची उदरगत लायट हावस संचालनालया वरवीं जाता. जाल्यार सांत जासींत जुंव्यार आशिल्ल्या लायट हावसाची उदरगत एमपीए करतले, अशें विनोदकुमार हांणी सांगलें.
तीन राष्ट्रीय न्हंयो जाल्यो राष्ट्रीय उदका मार्ग
गोंयांतल्यो स न्हंयो ह्यो राष्ट्रीय उदका मार्ग म्हूण अधिसुचीत केल्यात. तातूंतल्यो तीन न्हंयो ह्यो राष्ट्रीय उदका मार्ग म्हूण चालीक लागल्यात, अशें विनोदकुमार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
