भांगरभूंय | प्रतिनिधी
एमबीबीएस, बीडीएस पदवीधरांचो येवजणेक प्रतिसाद नाच, एकावंटंट पदां फूल
भांगरभूंय । प्रतिनिधी
पणजी : एप्रेंटीस येवजणेचे कबलातीचेर सय करून 4,500 तरणाटे सरकारी खात्यांनी एप्रेंटीस म्हूण सेवेंत दाखल जाल्यात. अशें आसलें तरी एकटोय दोतोर (एमबीबीएस) वा डेंटिस्ट (बीडीएस) एप्रेंटीस येवजणे खाला सरकारी खात्यांनी दाखल जावंक ना. पदवीधर अभियंते मात खाजगी कंपन्यांनी दाखल जाल्यात. कारागिरी आनी कुशळटाय उदरगत खात्याचे संचालक एस. एस. गांवकार हांणी ही म्हायती दिली.
एप्रेंटीस येवजण सगळ्या तरणाट्यां खातीर आसा. धावी नापास, पदवीधर, आयटीआय, अभियंते, एमबीबीएस, बीडीएस अशें शिक्षण घेतिल्ले सगळे तरणाटे येवजणेचो लाव घेवपाक शकतात. गोंय वैजकी म्हाविद्यालय, भलायकी खातें तशेंच भलायकी केंद्रांनी दोतोरांचो उणाव आसा. भलायकी केंद्रांनी दातांच्या उपचारां खातीर डेंटिस्टांची गरज आसता. तरी एमबीबीएस वा बीडीएस जाल्ल्या एकल्यानूय येवजणे खातीर कबलात करूंक ना. हाका लागून हे येवजणेचो लाव भलायकी खातें वा गोंय वैजकी म्हाविद्यालयाक जावंक ना. वीज खातें, भौशीक बांदकाम, उदका पुरवण खात्यांनी अभियंत्यांची गरज लागता. सरकारी खात्यांनी पदवीधर तशेच पदविका धारक अभियंत्यांनी अर्ज केल्यात. फार्मसी तशेंच हेर खाजगी कंपन्यो पदवी अभियंत्यांक 30 हजार रुपया मेरेन विद्या वेतन दिता. हाका लागून सरकारी खात्यां परस अभियंते येवजणे खाला खाजगी कंपन्यांनी दाखल जाल्यात, अशें गांवकार हांणी सांगलें.
दोतोर तशेंच डेंटिस्ट पदवी घेतले उपरांत खाजगी प्रॅक्टीस करतात. खाजगी हॉस्पिटलांनी बऱ्यो संदी आसतात. हाका लागून तांकां अशे येवजणेंची गरज नासता, अशें मत दोतोरांनी उलयतना सांगलें.
मुख्यमंत्री एप्रेंटीसशीप येवजणे खाला सरकारी खातीं तशेंच खाजगी कंपनींनी तरणाट्यांक एका वर्सा खातीर प्रशिक्षण दिवपाची तजवीज आसा. संवसारीक कुशळटाय दिसा 15 जुलयाक येवजणेचो शुभारंभ जालो. येवजणेक दोन म्हयने जावपाक आयल्यात. येवजणे खाला म्हयन्याक 8 हजार ते 13 हजार रुपया मेरेन विद्यावेतन दिवपाची तजवीज आसा.
सरकारी खात्यांनी 9 हजारां परस चड एप्रेंटीसशीप पदां तयार जाल्यात. येवजणेचो शुभारंभ जाल्लो तेन्ना सरकारी खात्यांनी 6,400 पदां तयार जाल्लीं. आता 10 हजार पदां तयार जाल्यांत. सगल्या खात्यांनी एकावंटस एक्झिक्युटीव आनी डेटा एंट्री ऑपरेटरचीं पदां भरल्यांत. आतां एकावंटस एक्झिक्युटीव आनी डेटा एंट्री ऑपरेटरा खातीर सरकारी खात्यांनी संद ना.
एका परस चड कबलातींचेर सय केल्ल्यान खात्यां मुखार समस्या निर्माण जाल्ली. ही समस्या आतां पयस जाल्या.
खाजगी उद्देगांनी 9 हजारां परस चड पदां तयार जाल्यात. 5 हजार तरणाटे खाजगी कंपनींनी रुजू जाल्यात. खाजगी कंपनी परस तरणाटे सरकारी खात्यांनी प्रशिक्षण घेवपाक चड इत्सूक आसतात, अशें संचालक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
