भांगरभूंय | प्रतिनिधी
फोंडेंः राष्ट्रीय शिक्षण धोरण (एनईपी) 2020 प्रमाण राज्य सरकारान 1 एप्रील सावन नव्या शिक्षणीक वर्साक सुरवात करपाच्या निर्णयाक उच्च माध्यमीक शिक्षक संघटणेन तेंको दिला. 16 फेब्रुवारीक फोंडें जाल्ले संघटनेचे वर्सुकी सर्वसादारण बसकेंत हो थाराव एकमतान मंजूर केलो. अध्यक्ष बाबाजी सावंत हांच्या प्रस्तावा उपरांत हो थाराव मंजूर जालो.
गोंयांतलें शिक्षणीक वर्स दर वर्सा जून म्हयन्याचे सुरवेक सुरू जाता, पूण एप्रिल म्हयन्यांत शिक्षणीक वर्स सुरू करप राष्ट्रीय आनी आंतरराश्ट्रीय शिक्षण वेवस्थे प्रमाण आसता. हाका लागून राष्ट्रीय शिक्षणीक सुदारणां कडेन बरो समन्वय आनी राष्ट्रीय शिक्षण धोरणाच्या शिफारशींची अंमलबजावणी सोपी करपाक मेळूं येता असो विस्वास बसकेंत हजर आशिल्ल्यांनी उक्तायलो.
राष्ट्रीय शिक्षण धोरण 2020 चो मुखेल हेत म्हळ्यार ताण मुक्त आनी विद्यार्थ्यांक अनुकूल शिक्षण वेवस्थेक चालना दिवप. फाटल्या कांय वर्सां सावन जायत्या हायस्कुलांनी एप्रीलांत अनौपचारीक रितीन वर्ग सुरू करतात. शिक्षणीक कॅलेंडराचो एक भाग म्हूण हाका औपचारीक केल्यार सगळ्या संस्थानी एक सारके जातले.
शिक्षणीक, संस्कृतीक महोत्सवाचे आयोजन
उच्च माध्यमीक शिक्षकां खातीर मेगा शिक्षणीक आनी सांस्कृतीक महोत्सव 29 एप्रीलाक घडोवन हाडपा विशीं हें बसकेंत चर्चा जाली. शिक्षणीक सहकार्याक तेंको दिवप, सांस्कृतीक अभिव्यक्तीक प्रोत्साहन दिवप, शिक्षकां मदीं वेवसायीक नेटवर्किंग सुलभ करप हो महोत्सवाचो हेत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
