एनईपी: दोन वर्सांत उबारतले साधन-सुविधा

भांगरभूंय | प्रतिनिधी

-मुख्यमंत्र्याची हमी; अंमलबजावणी ताकतिकेन जाता, ​विरोधकांचो दावोपणजीः राज्यांत प्राथमीक, णववी आनी उच्च माध्यमिका खातीर नवे राष्ट्रीय शिक्षण धोरण (एनईपी) चालीक लायलां. फुडल्या दोन वर्सांत सगल्या सरकारी शाळांनी ‘एनईपी’ संबंदीत गरजेच्यो सुविधा उबारतले. अनुदानीत संस्थांनी स्वताच्या खर्चान सुविधा उबारप गरजेचें अशें मुख्यमंत्र्यानी सांगलें. सोमारा विधानसभा सभाघरांत उलयतना मुख्यमंत्री डॉ. प्रमोद सावंत हांणी हे विशीं स्पश्ट केले.

प्रस्नोत्तरा वेळार आमदार एल्टन डिकोस्टा हांणी ‘एनईपी’ संबंदी एक प्रस्न मांडलो. पूर्व प्राथमीक प्राथमीक, णववी आनी उच्च माध्यमीका खातीर ‘इनईपी’ राज्य सरकारान चालीक लावपाक सुरवात केल्या. पूण जायत्या शाळांनी गरजेच्यो सुविधा नात. अशें परिस्थितींत सरकार ‘इनईपी’ योग्य रितीन कशी चालीक लायतलें, आनी आतां मेरेन एनईपी चालीक लावपा खातीर सरकारान कशी तयारी केल्या अशें डिकोस्टा हांणी विचारलें. हे विशीं उलयतना मुख्यमंत्र्यांनी म्हणलें, गोंयान ‘इनईपी’ संबंदीं पुराय देशांत बरें काम केलां. फावंडेशन पांवड्यार ‘एनईपी’ चालीक लावपा खातीर 94 मास्टर ट्रेनरांक प्रशिक्षण दिलें. ह्या मास्टर ट्रेनरांनी प्राथमीक शिक्षकां वांगडाच आंगणवाडींत शिकोवपी 3000 शिक्षकांक प्रशिक्षण दिलां. ताणें वेगवेगळे कार्यशाळा घेतल्यात. आतां मेरेन सरकारान 720 संघटनांक ‘इनईपी’ चालीक लावपाक परवानगी दिल्या.नणवे खातीर ‘गोंय स्टेट स्टकूल स्टँडर्ड असेसमेंट अँड ​अॅक्रिडेशन’ आनी ‘जी स्काप’ अशी दोन प्राधिकरणां स्थापन करपी गोंय देशांतले पयले राज्य आसा, अशें मुख्यमंत्री डॉ. सावंत हांणी म्हणलें.

‘इनईपी’च्या अंमलबजावणे खातीर 100 टक्के साधनसुविधा शाळांनी उपलब्ध नात. सरकारी शाळांनी दर्जेदार नितळसाण, रेस्टरूम‍, क्लासरूप तयार करपाची जापसालदारकी सरकारची आसा. जाल्यार अनुदानीत शाळांक सरकार निधी दिता. ताका लागून स्वता जावन गरजेच्यो साधनसुविधा उबारप ही तांची जापसालदारकी आसा, अशेंय तांणी सांगलें. विधोरी पक्षफुडारी युरी आलेमांव, आमदार कार्लुस फेरेरा आनी व्हेंझी व्हिएगश हांणीय ह्या वेळार प्रस्न उपस्थीत केले.

………………………………………..

गणीत, विज्ञानाची पर्वरी प्रयोगशाळा

‘इनईपी’ खातीर गरजेची प्रयोगशाळा स्थापन करपा खातीर सरकारान अर्थसंकल्पांत 90 लाखांची तजवीज केल्ली. पूण प्रयोगशाळा स्थापन करिनासतना णवव्या वर्गा खातीर ‘इनईपी’ चालीक लावपाक कशी सुरवात जाली असो प्रस्न आमदार व्हेंझी विएगाश हांणी मांडलो. ताचेर जाप दितना पर्वरी एससीआरटीच्या इमारतीत गणीत आनी विज्ञान ह्या दोन विशयांची प्रयोगशाळा सुरू जातली. प्रयोगशाळे खातीर चार कोटी रुपयांची तजवीज केल्या. 90 लाख रुपया मंजूर जाल्यात अशें मुख्यमंत्र्यांनी सांगलें.

………………………………………..

जर्मन, फ्रेंच, पुर्तुगेझ भाशेचोय पर्याय

एनईपांतली इंग्लीश ही पयली भास. मागीर मराठी, कोंकणी, इंग्लीश ही दुसरी भास. हाचे भायर राज्य सरकारान विद्यार्थ्यांक जर्मन, फ्रेंच आनी पुर्तुगेझ भासांचोय पर्याय दिला. देखून विद्यार्थ्यांक हे विदेशी भाशेंतूय शिकपाक मेळटा अशें मुख्यमंत्री डॉ. सावंत हांणी सांगलें.

………………………………………..

आतां मेरेन ‘इनईपी’ खातीर 88.38 लाख खर्च

इनईपी चालीक लावपा खातीर राज्य सरकारान आतां मेरेन 88.38 लाख रुपया खर्च केल्यात अशी म्हायती मुख्यमंत्र्यांनी दिली. आमदार विजय सरदेसाय हांणी विचारिल्ल्या लेखी प्रस्नाच्या जापेंत ही म्हायती मुख्यमंत्री डॉ. प्रमोद सावंत हांणी दिल्या.‘इनईपी’ विशी जागृताय करपा खातीर सुमार 11 लाख आनी कार्यशाळा आनी हेर कार्यावळीं खातीर सुमार 73.73 लाख खर्च जाल्यात, अशें तांणी सांगलें.

…………………………..

आमदार कार्लोस फेरेरा हांणी मांडिल्लें मुद्दे

1. इनईपीक’ आमचो विरोध ना. पूण, राज्य सरकार हें धोरण घायबडबडेंत चालीक लायता.

2. ‘एनईपी’ 2020’ हो एक बरोच बरो दस्तावेज म्हणून केंद्र सरकारान हाडला. देखून विचारांत क्रांती निर्माण जाल्या.

3. गोंय खातीर ‘एनईपी’ अंमलबजावणी राष्ट्रीय शिक्षणीक संशोधन आनी प्रशिक्षण मंडळाच्या (एनसीईआरटी) गरजे कडेन जुळोवंक मेळना. एनईपीन थारायिल्ले प्रमाण राज्यान अजून राष्ट्रीय अभ्यासक्रम येवजणे खातीर अभ्यासक्रम तयार करूंक ना.

4. एनईपी नेमान, बिगर सीबीएसई शाळां खातीर सीबीएसई आनी एनसीईआरटी खातीर वेगळी प्रक्रिया थारायता. अभ्यासक्रम, वरां, पत पद्दत आनी भाशे खातीर एनसीईआरटीच्या गरजां संबंदी राज्य सरकार एनईपीक कसो पाळो दिवं येता?

5. ‘8.5डी’ खाला एनईपींत राज्यांतल्या शिक्षणीक मानकां सयत शिक्षणीक गजालींचें फुडारपण ‘एनसीईआरटी’ कडेन समन्वय आनी सहकार्यान ‘एससीईआरटी’ करतले. पूण, एनसीईआरटीन अजून गोंय सरकाराक अभ्यासक्रम दिवंक ना.

6. राष्ट्रीय पत चौकटी (एनसीआरएफ) गोंय राज्य शिक्षण मंडळा पसून स्वतंत्र सीबीएसई शाळा पाळत आसात. केंद्र सरकारान शाळेच्या शिक्षणा खातीर राष्ट्रीय अभ्यासक्रम चौकटी (एनसीएफ) 2023 तयार केली. ‘एनसीआरएफ’ आनी ‘एनसीएफ’ हांचो व्हडलो घुस्पागोंदळ आसा.

7. राज्य सरकारान एका वयल्यान दुसऱ्या मेरेन चालीक लावपाचो अभ्यासक्रम घेतला. हांगाच चूक आसा, आनी ताचो परिणाम सगळ्यांचेर जातलो. ‘एनसीएफ’ खातीर एनसीआरएफचे सीबीएसई वरांची नकल केल्या, तातूंत विसंगती आसा. ते प्रमाण सांजवेळा स वरां मेरेन विद्यार्थी शाळेंत रावपाचे आसात.

8. 1 क्रेडीट म्हणल्यार 15 वरां आनी प्रॅक्टिकला खातीर एक क्रेडीट 30 वरांचे अाशिल्ल्याचे ‘एनसीआरएफ’न म्हणलां. पूण गोंय सरकाराच्या मतान एक क्रेडीट 30 वरांचेर आसा.