भांगरभूंय | प्रतिनिधी
44 सुवातींनी धाड घालून 13 जाणांक अटक
पणजी, बातमीदार ः राष्ट्रीय तपास एजन्सी (NIA) कडल्यान आयज सकाळीं सावन कर्नाटक आनी महाराष्ट्रांतल्या सुमार 44 सुवातींनी धाड घालून 13 जाणांक अटक केल्या. इस्लामिक स्टेट ऑफ इराक अँड सिरिया (ISIS) संघटणे वरवीं देशभरांत आतंकवादी हल्ले करपाच्या कटाच्या संबंदीत ही धाड घाल्ली. आयएसआयएस ही संवसारांतली सगळ्यांत भिरांकूळ आतंकवादी संघटना मानतात.
कर्नाटकांतल्या एका सुवातेर धाड घाल्या. त्याच वेळार एनआयएच्या अधिकाऱ्यांनी पुण्यांत 2, ठाणे वाठारांत 31, ठाणे शारांत 9 आनी भाईंदरांत एका सुवातेर धाड घाल्या. भारतांत आतंकवाद आनी हिंसाचार पातळावपाक आतंकवादी संघटनेची येवजण बंद करपा खातीर एनआयए पुराय तपास करता.
एनआयएच्या अधिकाऱ्यांच्यी धाडी अजूनय चालू आसा. अशे परिस्थितींत अधिकाऱ्यांक कसलेय संकेत वा पुरावे मेळ्ळे जाल्यार हेर सुवातींनीय धाड घालतले अशी अपेक्षा आसा. हाका लागून धाड घालपाचो आंकडो वाडटलो. एनआयए कारवाय करता ती इस्लामिक स्टेट कडेन संबंदीत आसा. इस्लामिक स्टेटचे कांय आतंकवादी अजूनय सक्रीय आसात, जे भारतांतय आसूं येता.
आयएसआयएसाचे स्वता तयार केल्ले मॉड्यूल देशभर पातळ्ळ्यात. आयएसआयएसाचे अशे मॉड्यूल खास करून महाराष्ट्रांत लिपून आशिल्ल्याचें कळ्ळां. हाचे पयलीं लेगीत महाराष्ट्रांत अशे मॉड्यूल उक्ते जाल्यात.
आतंकवादी तरणाट्यांक भरती करून भारत विरोधी वावर करपाक सोदतात. तशेंच आयएसआयएस मॉड्यूला वरवीं ह्या तरणाट्यांक आतंकवादी संघटनेंत भरती केल्यात काय ना हाचोय तपास अधिकारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
