भांगरभूंय | प्रतिनिधी
नवी दिल्ली, खबरां संस्था ः फाटल्या कांय वर्सांत ल्हान पिरायेच्या लोकांचेर लेगीत ताण वाडत आसा. कामाचो ताण, जिणे पद्दत, दिसपट्टी धांवपळ हाका लागून लोक ह्या दिसांनी डिप्रेशनाचे बळी पडपाक लागल्यात. हार्वर्ड मेडिकल स्कूल आनी मॅसॅच्युसेट्स जनरल हॉस्पिटलांतल्या संशोधकांनी हालीं केल्ल्या नव्या अभ्यासांत हाचेर एक उपाय मेळ्ळा. ह्या अभ्यासा प्रमाण दर दिसा एक संत्रें खाल्यार डिप्रेशनाचो धोको 20 टक्क्यांनी उणो जाता. हो अभ्यास मायक्रोबायोम नेमाळ्यांत उजवाडाक आयला.
ह्या संशोधनांतल्यान अशें कळटां, संत्रांसारक्या लिंबूवर्गीय फळां वरवीं फेकल बॅक्टेरियम प्रुस्नित्झी (Fecal Bacterium Prausnitzii) नांवाचो खाशेलो बॅक्टेरिया कुडींत वाडटा आनी ताचो परिणाम सेरोटोनिन आनी डोपामायन ह्या हार्मोनांच्या उत्पादनाचेर जाता अशें दिसून आयलें. हाका लागून मनशाचो मूड सुदारता आनी डिप्रेशनाचो धोको उणो करपाक मजत जाता.
डिप्रेशन आयलां हें कशें कळटा?
लेगीत नकारात्मक भावना, वागणुकेंत बदल आनी कांय शारिरीक लक्षणां स्वता मदीं आसल्यार डिप्रेशन आसा हें कळटां. डिप्रेशनान मनशाक खर दुख्ख, कामाची आवड उणी जावप, भूक वा न्हिदेच्या संवयांत बदल, चड थकवो येवप आनी लक्ष केंद्रीत करपाक वा निर्णय घेवपाक कठीण जाता. दोन सप्तकां परस चड काळ हीं लक्षणां उरल्यार तज्ञांचो सल्लो घेवप म्हत्वाचें.
एक लाख लोकांचेर अभ्यास
ह्या संशोधनांत 1 लाखां परस चड बायलांच्या आहार आनी भलायके संबंदीत डेटाचें विश्लेशण केलां. ह्या निकालांत फकत संत्रां, लिंबू, हंगामी फळां आदी लिंबूवर्गीय फळां खाल्यार डिप्रेशनाचो धोको उणो जाता. जाल्यार आपोल, केळीं सारकिल्या हेर फळांचो असो परिणाम दिसना. लिंबूवर्गीय फळांत मेळपी घटक कांय प्रकारच्या आंतकड्यांच्या बॅक्टेरियांक चालना दितात आनी तांचो मानसीक भलायकेचेर सकारात्मक परिणाम जाता अशें शास्त्रज्ञांचें मत आसा.
संत्रां भलायकेचो एक खजिनो
संत्रांतलें जीवनसत्व सी कुडीची रोगप्रतिकार शक्त वाडयतात आनी कातींत सुदारणा करता. ते भायर संत्रांतले फ्लेव्होनॉइड्स काळजाची भलायकी सुदारता, कोलेस्टेरॉल नियंत्रीत करतात आनी रगतपेशी ब्लॉक जावपा पसून आडायता. संत्रांनी मेळपी तंतू पचनक्रिया सुदारता आनी पोटांतली चरबी उणी करपाक मजत करता.
तज्ञ म्हणटात…
ह्या अभ्यासाचें फुडारपण करपी डॉ. राज मेहता सांगता, फुडाराक डिप्रेशनाचेर उपचार करपा खातीर वखदां मदीं संत्रांचो आस्पाव करूं येता. डिप्रेशन ही एक गंभीर समस्या आसून ताचेर उपचारा खातीर नवे आनी सुरक्षीत पर्याय जाय. अशा वेळार संत्रांचो सादो आनी दुश्परिणाम नाशिल्लो उपाय आसूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
