भांगरभूंय | प्रतिनिधी
दिल्लीची गादी जिखप केंद्रांत सत्तेर आशिल्ल्या भारतीय जनता पक्षा खातीर कितलें म्हत्वाचें आसा हें फाटल्या म्हयन्या देड म्हयन्यांत राष्ट्रीय लोकशाय आघाडीन प्रचारांत जो नेट लायला ताचे वेल्यान स्पश्ट जालांच. आतां केंद्रीय अर्थसंकल्पांतल्यानूय नरेंद्र मोदी हांच्या सरकारान हें दाखोवन दिलां की दिल्लीचे गादये खातीर हें सरकार फक्त थंयच्या लोकां खातीरच न्हय जाल्यार पुराय देशांतल्या लोकां खातीरय कितेंय ना कितें दिवपाक सज्ज जालां. दिल्ली विधानसभा वेंचणुके खातीर फाल्यां बुधवारा मतदान जातलें, आनी दिल्लीकारांचो स्पश्ट असो कौल मेळोवपा खातीर अशी काय जादवाची बडी घुंवडोवपाची प्राप्त परिस्थितींत गरज आशिल्ली की ताचे बगर अनुकूल असो जनादेश मेळटलाेच हाची कसलीच शक्यताय नाशिल्ली. दिल्लीकारांक त्योच त्योच फुकटच्या रेवड्यांचो उबगण आयिल्ल्याचें संकेतूय मेळटाले. अशा वेळार जाची कोणे अपेक्षाच करूंक नाशिल्ली त्याच मोदी सरकारान दिल्लीतल्या मतदारांच्या पदरांत उडयलां. आतां वेंचणूक निकालाची धस्ती भारतीय जनता पक्षाक न्हय जाल्यार अरविंद केजरीवाल हांच्या आम आदमी पक्षाक घेवची पडटली अशीच परिस्थिती दिल्लींत निर्माण जाल्या. मोदी सरकारान जादवाची बडी घुंवडायतनाच मतदारां मुखार कसलेच पर्याय दवरिल्ले नात, की तांणी भाजपाक आतां कित्याक न्हयकारचें. दिल्लीची गादी काबीज करपा खातीर सुमार एक लाख कोटींचेर उदक सोडून नरेंद्र मोदी सरकारान अनोखी अशी भेट फक्त दिल्लीकूच न्हय जाल्यार सगल्या देशवासियांक दिल्या.
दिल्ली विधानसभा वेंचणुकेचो निकाल जाहीर जाले उपरांतूय खूबशे दीस केंद्रांतल्या सरकारान अर्थसंकल्पांतल्यान लोकांक कितें दिलें हाची चर्चा चालूच उरतली आसली तरी नेमकी संद सादून केंद्रीय अर्थ मंत्री निर्मला सीतारामन हांणी जो अर्थसंकल्प संसदेंत सादर केला ताचे विशीं ताचे खूबशे स्रय तांचे कडेन वता. बारा लाख मेरेनचें उत्पन्न आयकरमुक्त जावंक शकतलें अशें सपनांत लेगीत आयज कोण पळोवंक शकचो ना अशी परिस्थिती आसतना अर्थ मंत्री निर्मला सीतारामन हांणी लोकसभेंत अर्थसंकल्प मांडटना तो प्रस्ताव सादर केलो तेन्ना खूबशा जाणांचो विस्वासूच बसूंक नाशिल्लो, पूण तें घडिल्लें. दिल्ली वेंचणुकेच्या निमतान काय जायना जादवाची बडी घुंविल्ली. ह्या प्रस्तावाक लागून महसुलांत सुमार एक लाख कोटींचो उणाव जातलो हाची पुराय कल्पना आसून लेगीत निर्णय जाहीर जाल्लो. खंयच्याच राजकी लावा खातीर हें पावल मोदी सरकारान उबारिल्लें ना अशें कोणूय म्हणटात आसत जाल्यार म्हणूं, पूण दिल्लीची वेंचणूक दोळ्या मुखार दवरूनच हो निर्णय घेतला हें वास्तव कोणूच न्हयकारचो ना. यमुना न्हंयच्या दुशीत उदका वेल्यान फाटले खूबशे दीस दिल्लीत एकप्रकारचें जें झूज चल्लां तें पळयत जाल्यार केंद्रांतल्या सरकारान सुमार एक लाख कोटी यमुनेच्या पात्रांत उडोवन आम आदमी पक्षाक एके तरेचें आव्हानूच दिलां अशें म्हणूंक येतलें. यमुना न्हंय फाटल्या धा-इकरा वर्सांत नितळ करूंक शकले नात हें अरविंद केजरीवाल मान्य करून मेकळे जाल्यात, अशा वेळार यमुना नितळ करपा खातीरचें आव्हान स्विकारूनच भाजपान एक लाख कोटींच्या महसुलाचेर यमुनेचें उदक सोडिल्लें दिसता.
दिल्लीची गादी ह्या वेळार आम आदमी पक्षा कडल्यान झोमून घेवचीच असो निश्चेव करूनच भारतीय जनता पक्षान विडो उबारला हें भाजपान उबारिल्लीं शिस्तबद्ध पावलां आनी केल्लो प्रचार हातूंतल्यान स्पश्ट जाता. केजरीवालांच्या 85 कोटींचो शिमहल वा शंबर दोनशें कोटींचो सोरो घोटाळो आनी ताका दुशीत यमुनेची मेळिल्ली जोड हाचेरूच दिल्लीची वेंचणूक जिखूंक येवची ना हाचो अदमास भाजपाक लागलो. तशेंच फुकट रेवड्योय अपेक्षीत इप्सीत साद करपाक विशेश साह्यभूत थारचे नात हें जाणवल्ल्यान घडये अर्थसंकल्पाच्या माध्यमांतल्यान दिल्लीकारांच्या बोल्सांत हात घालिनासतना तांच्या बोल्सांत पयशे खुळखुळत उरचे हे खातीर एखादें धडाकेबाज पावल उबारप वा निर्णय घेवप भाजपाच्या फुडाऱ्यांक दिसुये, आनी तातूंतल्यानूच अर्थसंकल्पाच्या माध्यमांतल्यान दिल्लीकारूच न्हय जाल्यार देशांतल्या मध्यमवर्गियां खातीरय हो प्रस्ताव मुखार आयलो. आंकड्यांत सांगपाचें जायत जाल्यार दिल्लीतल्या सुमार 65 ते 67 टक्के लोकांक आयकर कायद्यांत करतल्या प्रस्तावीत तरतुदीचो थेट लाव मेळटलो. दिल्लीची गादी खूबशा काळा उपरांत जिखपा खातीर नरेंद्र मोदी हांच्या सरकाराचो सुमार एक लाख कोटी रुपयांचो हो मास्टर स्ट्रोक तांकां कितले मेरेन येस मेळोवन दितलो हें आतां कांय दिसां भितरूच कळून येतलें. दिल्ली खातीर हेर कांय येवजण्योय भाजपान आपल्या संकल्पनाम्यांत जाहीर केल्ल्यो आसल्यो तरी नव्या तरतुदींचो आम आदमी आनी तांच्या अरविंद केजरीवाल हांणी धसको घेतलो ना जाल्यार तें नवलूच थारतलें.
केंद्रीय अर्थसंकल्पांतले तरतुदीक लागून दिल्लीचे उदरगतीक केन्ना ना इतली गती मेळटली हातूंत कसलोच दुबाव ना. दुशीत यमुनेक लागून आम आदमी पक्षाच्या फुडाऱ्यांच्या दोळ्यांतल्यान दुकां व्हांवूंक लागिल्ल्याचें चित्र दिसता. राजधानी दिल्लीच्यो हेर कांय गंभीरय समस्या लेगीत वेंचणुके निमतान मुखार आयल्यात ताचीय दखल भाजपाच्या फुडारपणान घेतिल्ल्याचें केंद्रीय अर्थसंकल्पांतल्यो तरतुदी पळयत जाल्यार जाणवता. दिल्ली ह्या वेळार खंयचेच परिस्थितींत वच्ची न्हय हाची पुराय जतनाय तांणी घेतिल्ल्याचें स्पश्ट दिसता. काँग्रेस पक्षाची उपस्थिती तांकां कितल्यो सुवातो मेळटल्यो हाचे परस आम आदमी खातीर कितली मारक थारतली हाचीच चर्चा सद्या चड जातना दिसून येता. काँग्रेसीचें फुडारपण म्हणल्यार राहूल गांधी, प्रियांका वाड्रा आनी हेर कांय जाण भाजपाचे बरोबरीन म्हणूंक येतले अशे पद्दतीन केजरीवाल आनी तांच्या आम आदमी पक्षाचेर हल्लो करतना दिसतात. दिल्लीतलो जाहीर प्रचार आयज सोंपिल्लो आसलो तरी लोकसभा वेंचणुके वेळार गळ्यांत गळो घालून भोंवपी हे लोक आयज एकामेकांचे मानगुटीर बसल्यात अशेंच चित्र पळोवंक मेळटा. काँग्रेसीन एक काळ सेगीत पंदरा वर्सां राज्य केलें जाल्यार भाजपानूय उपरांत ही गादी आपले कडेन राखली. आम आदमी पक्षानूय तीन वेंचणुको जिखून सेगीत राज्य केलां, अशे परिस्थितींत आम आदमी पक्षाचें काम सोंपें निश्चितूच नासतलें. ताचोच फायदो घेवन भाजपान आपल्या भात्यांतलें निमाणचें अस्त्रूय आम आदमीचेर उबरलां. उत्तर प्रदेशांतलो महाकुंभ लेगीत भाजपाक लावकारी थारतलो अशीच चर्चा आसा. आतां हाची जाप कांय दिसां भितर मेळटली. एक लाख कोटींचो मास्टर स्ट्रोक फुकट वच्चो न्हय इतलीच अपेक्षा भाजप बाळगून आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.