भांगरभूंय | प्रतिनिधी
निवाड्याक भलायकी मंत्र्यांनी दिलो येवकार
पणजी, प्रतिनिधी : जम्मु काश्मीरा खातीर लागू केल्ले 370 कलम रद्द करपाचो निर्णय सर्वोच्च न्यायालयान योग्य थारायला. एक देश, एक निशाण, एक प्रधान ही धारणा ह्या निर्णयान घटमुट केल्या. 370 कलम रद्द जाल्ल्यान जम्मु काश्मीर आनी लडाख वाठार आतंकवादा पसून आनीक सुरक्षित जातलेच, शिवाय उदरगती कडेन तांची नेटान वाटचाल जातली, अशी प्रतिक्रीया मुख्यमंत्री डॉ. प्रमोद सावंत हांणी उक्तायल्या. भलायकी मंत्री विश्वजीत राणे हांणीय ह्या निर्णयाक येवकार दिला.
प्रधानमंत्री नरेंद्र मोदी हांच्या फुडारपणा खाला जम्मु काश्मिरांत लोकशायेचें एक नवें पर्व सुरू जालां. 370 कलम रद्द जाल्यान जम्मु काश्मीर हो वाठार आता खऱ्या अर्थान देशांत विलीन जाला, अशें मुख्यमंत्री सावंत हांणी म्हणलां.
एक देश ह्या नरेंद्र मोदी हांचे संकल्पनेक येवकार दिवपी सर्वोच्च न्यायालयाचो निवाडो आसा, अशें विश्वजीत राणे हांणी म्हणलां. सगळ्यांक समान कायदो आसचो, ही संकल्पना ह्या निवाड्यान घटमुट जाता. भारताची उदरगत, एकचार आनी समृद्धताये खातीर सगळ्यांनी एकठांय येवपाक जाय, अशें श्री. राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
