एकूय घर, देवूळ वच्चें ना

भांगरभूंय | प्रतिनिधी

मुख्यमंत्री डॉ. प्रमोद सावंत हांची भोमाच्या लोकांक हमी

भांगरभूंय । प्रतिनिधी

सांखळी : भोमा गांवांतल्या नियोजीत बायपास मार्गाक लागून गांवांतलीं घरां वा देवूळ लेगीत वचपाक दिवचों ना, अशी हमी मुख्यमंत्री डॉ. प्रमोद सावंत हांणी शेनवारा भोमाच्या लोकांक दिली. तशेंच हे संबंदांत सोमारा सकाळीं मंत्रालयांत तंत्रीक पंगडा कडल्यान म्हामार्गाच्या चारपदरीकरणाचें सादरीकरण थळाव्या लोकांचे हे विशींचे गैरसमज पयस करपाचें उतर दिलें.

राष्ट्रीय म्हामार्गा वयल्या पोरणे गोंय ते भोम ह्या सात किलोमिटर लांबायेच्या रस्त्याचें चारपदरीकरण करपाचें केंद्र रस्ते येरादारी मंत्रालयान निश्चीत केलां. ते खातीर सुमार 1060 कोटींचो निदी मंजूर केला. पूण ह्या चारपदरीकरणाच्या कामांत कांय घरां आनी देवूळ लेगीत वचपाचो भंय उक्तावन थळाव्या लोकांनी फाटल्या कांय म्हयन्यां सावन आंदोलन सुरू केल्लें. मंत्री तशेंच थळावे आमदार गोविंद गावडे हांणीय हे संबंदांत थळाव्या लोकांचें समाधान करपाचो यत्न केल्लो. पूण थळाव्या लोकांनी शेनवारा सकाळीं हे संबंदांत मुख्यमंत्री डॉ. सावंत हांची सांखळे भेट घेवन दुबाव पयस करून घेवपाचो यत्न केलो. त्या वेळार राष्ट्रीय म्हामार्गा वयल्या पोरणे गोंय ते भोम मेरेनच्या वाठारांतलें एकूय घर वा देवूळ ह्या कामांत आपूण वचपाक दिवचों ना, अशें आस्वासन मुख्यमंत्री डॉ. सावंत हांणी भोम गांवांतल्या लोकांक दिलें.

हे संबंदांत लोकां मदीं गैरससमज पातळ्ळ्यात. ताचें दुबाव पयस करचे खातीर सोमारा सकाळीं मंत्रालयांत तंत्रीक पंगडा कडल्यान सादरीकरण करतले. हो मार्ग कशे तरेन बांदतले, तें ह्या सादरीकरणांतल्यान स्पश्ट जातलें. ताका लागून सादरीकरणा खातीर थळाव्या लोकांनी हाजीर रावचे, असोय उलो मुख्यमंत्र्यांनी मारला.

मजगतीं, म्हामार्गाच्या चारपदरीकरणांत भोमांतल्या लोकांचीं घरां तशेंच देवूळ वचपाचो भंय उक्तावन थळाव्या लोकांनी खूब म्हयन्यां सावन आंदोलन सुरू केलां. हीच संद घेवन विरोधी आमदारांनी लेगीत सरकाराचेर टिका करप चालूच दवरलां. रस्तो रुंदीकरणाच्या निमतान केंद्र आनी गोंय सरकारान भोम गांवांतल्या लोकां सयत तांचें दैवत आशिल्ल्या देवळाचेर लेगीत घालो घालता, असो दावो विरोधकांनी फाटले विधानसभा अधिवेशनांत लेगीत केल्लो. ताका लागून मुख्यमंत्री डॉ. प्रमोद सावंत हांणी थळाव्या लोकांची भेट घेवन, महामार्ग रुंदीकरणाचो थळाव्या लोकांचेर कसलोच परिणाम जावचो ना, अशी हमी दिल्या.

• भोम गांवांतल्यान वचपी नियोजीत रस्तो बांदतना कोणाचेंच घर वा देवूळ वच्चें न्हय हे खातीर आपूण पुराय यत्न करतां. तशी परिस्थिती उप्रासली जाल्यार संबंदीत भाग वगळपाची आपली तयारी सा. पूण ते खातीर थळाव्या लोकांनी सरकाराक आदार करून पयली सोमारचें सादरीकरण समजून घेवचें, असो उलो मुख्यमंत्री डॉ. प्रमोद सावंत हांणी सांगलें.
• मंत्रालयांतल्या सादरीकरणा उपरांत तंत्रीक विभाग भोम गांवांत प्रत्यक्ष भेट दिवन रस्त्याची आंखणी आनी हेर नियोजन दाखोवपाक शकलो व्हय, असो प्रस्न थळाव्या लोकांनी मुख्यमंत्र्यांक विचारलो. ताचेर हो आराखडो पयली मंत्रालयांतल्या सादरीकरणांत समजून घेयात. ते उपरांत तंत्रीक पंगडाक गांवांत धाडून पुराय आराखडो अख्ख्या गांवाक दाखोवपाची सुचोवणी आपूण तंत्रीक विभागाक करतलों, अशी हमी मुख्यमंत्र्यान भोमाच्या लोकांक दिली.