एका म्हयन्यांत वाडली गोंयकारांची म्युच्युअल फंडांतली गुंतवणूक

भांगरभूंय | प्रतिनिधी

पणजी : फाटल्या कांय म्हयन्यांत गोंया सयत पुराय देशांत शॅर बाजारांतली गुंतवणूक उणी जाल्ली, मात नव्या अर्थीक वर्सा सावन अशे गुंतवणुकेंत परतून वाड जाल्या. एप्रील 2025 च्या निमाणे मेरेन गोंयांतल्यान म्युच्युअल फंडांत 37 हजार कोटी रुपयांची गुंतवणूक केल्ली. मे 2025 च्या निमाणे मेरेन तातूंत 1600 कोटी रुपयांची वाड जावन ती 38 हजार 600 कोटीं रुपया जाल्या. असोसिएसन ऑफ म्युच्युअल फंड्स इन इंडिया (एएमएफआय) हे संस्थेच्या अहवाला प्रमाण ही म्हायती मेळ्ळ्या.

अहवाला प्रमाण गोंयांतल्या मे म्हन्यांत म्युच्युअल फंडांतली दर व्यक्ती फाटली गुंतवणूक लेगीत वाडल्या. एप्रील 2025 च्या निमाणे मेरेन गोंयांत दर व्यक्ती 2 लाख 37 हजार 640 रुपया म्युच्युअल फंडांत गुंतयल्ले. मे 2025 च्या निमाणे मेरेन तातूंत वाड जावन ती दर व्यक्ती 2 लाख 47 हजार 890 कोटी रुपया जाल्या. गोंयांतली दर व्यक्ती गुंतवणूक ही देशांत सगल्यांत चड आसा. हे वळेरेंत महाराष्ट्र दुसरे सुवातेर आसा. थंयच्यान दर व्यक्ती 2 लाख 36 हजार 290 रुपया म्युच्युअल फंडांत गुंतयल्यात. केंद्रशासीत प्रदेशांचो विचार केल्यार दिल्ली दर व्यक्ती म्युच्युअल गुंतवणूक सगल्यांत चड म्हणल्यार 2 लाख 88 हजार 840 रुपया इतली आसा.

अहवाला प्रमाण मे 2025 निमाणे मेरेनचे आंकडेवारी प्रमाण गोंयांतले वट्ट गुंतवणुकेंतले सगल्यांत चड 28 हजार 614 कोटी रुपया एक्विटी स्कीमींत गुंतयल्यात. 4 हजार 207 कोटी डेबीट ओरियेंटेड स्कीमींत, 843.19 कोटी लिक्वीड स्कीमींत जाल्यार सुमार 5 हजार कोटी रुपया हेर स्कीमींनी गुंतयल्यात. पुराय देशाचो विचार केलो जाल्यार मे 2025 च्या निमाणे मेरेन म्युच्युअल फंडांत सुमार 72 लाख कोटी रुपया गुंतयल्यात.

गोंयच्या 2.52 लाख लोकांची गुंतवणूक

राष्ट्रीय शॅर बाजाराच्या (एनएससी) अहवाला प्रमाण एप्रील 2025 च्या निमाणे मेरेन गोंयांतल्या 2.52 लाख लोकांनी शॅर बाजारांत गुंतवणूक केल्या. फाटल्या स म्हयन्यांत गोंयांत म्हयन्याक सरासरी अडेज हजारां परस अदीक नवे गुंतवणूकदार तयार जाल्यात. मार्च 2025 च्या निमाणे मेरेन गोंयांतल्या वट्ट म्युच्युअल फंड गुंतवणूकदारां मदले 32.4 गुंतवणूकदार ह्यो बायलां आशिल्लीं. महिला गुंतवणूकदाराची राष्ट्रीय सरासरी 24.3 टक्के इतली आशिल्ली.