भांगरभूंय | प्रतिनिधी
खूब दीस जाले, एक विचार मनांत घर करून रावला. जाल्ले अशे, कांय दिसा पयलीं एका व्हड विचारवंतान अशें मनीस स्वताकूच म्हणटा, आनी दर एक फावट हांव फक्त हांसतां. असो हो सॅल्फ प्रोक्लेम्ड असो कोल्ड विचारवंत दादलो. बायलांचेर ताचो विशिश्ठ राग. बायलां कशीं दुबळीं, तीं कशी दुसर्यांचेर म्हणजे पयली बापूय आनी मागीर घोव, पती परमेश्वर हांचेर अवलंबून आसतात, कितलींय शिकलीं, कितलींय व्हड पदवी मेळयलीं तरी तीं स्वताचे अर्थीक निर्णय, गुंतवणुको असले म्हत्वाचे निर्णय घेवपाक सक्षम नासता, हें सिद्ध करप ह्या विचारवंताचो आवडीचो विशय.
दुचाकी वा चारचाकी वाहन हे शिस्तीन चलोवप हें बायलांक केन्नाच शक्य जावचेना असो ताचो बायलांचेर विश्वास. हाका कोणें सांगला रे दुचाकी चलोवप? चलोवपाक नाका खरें तर चलप मनशाचे भलायकेक सदांच बरें, अशें सांगपी हो युगपुरूश स्वताच्या घरा कडल्यान देवती काडून प्रासार येतना लोकांची लिफ्ट मागतना दिसता. बायलेन कशें सुगरण आसचें, वेगवेगळ्या प्रकाराचे पदार्थ तिणें अन्नपुर्णेचो साक्षात अवतार घेवन घराघरांत तयार करून भुरग्याक आनी घोवाक पोट भरून घालचें. भायली खाणां कशी भलायकेक इबाड करूं शकतात त्या पेक्षा घरचें खाण कितलें बरें हो तर ह्या भलायकी विशेशज्ञाचो आवडीचो विशय. खंयच्या विश्वांत जगता असले लोक?
पिळग्यान पिळग्यो बायलेची भुमिका बदलत आयल्या आनी संवसारांतल्या वेगवेगळ्या वाठारांनी ती वेगळी दिसता. तांची सगळ्यांत मुळावी आनी पारंपरीक भुमिका म्हळ्यार भुरगीं जल्माक हाडप, तांकां वाडप, घर वेवस्थापन करप. जसो जसो काळ वता तसो तसो चड बायलांनी शिक्षीत जावन कामा धद्यांत प्रवेश केला. पूण हें थोड्यांक कळूंक ना.
मेकअप, फॅशनी करपी बायलांचेर ताचो खास आक्षेप. देवान दिल्लें रूप बायलां मेकअप करून कशी विद्रप दिसतात हें बेस बरें हो व्यक्ती तुमकां समजायतलो. केंसाक खोबरेल तेल लावप, केंस रंगोवप कशें वायट अश्या साबार गजालींचेर हो मनीस कितलींय वरां उलोवंक शकता. बायलांनी कशें दिसचें, कशे कपडे घालचे, कशें वागचें, कशें उलोवचें, एकूण एक संपूर्ण आदर्श बायल कशी आसची हाचेर ह्या हुशार मनशान विशेश अभ्यास केला.
नोकरी करपी बायले बद्दल तर विशेश दुस्वास. “हाका कित्याक रे नोकरी? फक्त मॅटरनिटी बॅनीफिट घेतात आनी सी.सी.एल घेतात, काम करपाक नाका” अश्यो विशेश टिपण्यो करपी हो मनीस णव म्हयने आपले आवयच्या गर्भांत कसो उरलो काय? असो प्रस्न म्हाका सदांच पडटा.
लिंग रुढिवाद म्हळ्यार बायलां आनी दादले हांचे कडेन आशिल्ल्या वा आसपाक जाय आशिल्ल्या गुणधर्मां विशीं वा दादले-बायलो वा करपाक जाय आशिल्ल्या भुमिका विशीं सामान्यीकृत नदर वा पूर्वधारणा. लिंग रुढिवाद सकारात्मक आनी नकारात्मक अशे दोनूय आसूं येतात, देखीक, “बायलो पोसतात” वा “बायलो दुबळ्यो”.
तर अशें हें व्यक्तिमत्व. बायलाचेर विशेश अभ्यास केल्लो असो हो महापुरूश. पुरूशप्रधान वेवस्थेंत आदर्श मानपी, बायलांक हिणसावपी, मनीस आपले बायले कडेन कसो वागता काय?
तर मजा अशी, ह्या मनशाचे बायलेक आपल्या गोऱ्या रंगाचेर खूब गर्व आनी घोव कसो सावळो घनश्याम हे ती सदांच उलोवन दाखयता. ताका दुचाकी चलोवपाची उमेद, केंस रंगोवप, मेकअप करप, घोवाक हिणसावप, भायल्यान जेवणाची पार्सला हाडप, घोवाचें एटीएम आपले पर्सींत घेवन भोंवप अशी ही व्यक्ती. हे सगळे जेन्ना म्हाका कळ्ळे तेन्ना म्हाका त्या म्हापुरसाचेर हांसचें काय ताची काकळूट करची हेंच कळना जाले. पयशे मोडटना ताका ‘ताका कितें कळटा सगळो संवसार हांवूच पळयता’ अशें म्हणपी ती खरी आदर्श बायल आनी आदर्श घोव कसो आसचो हो एक व्हड वाद विवादाचो विशय, मात ह्या म्हापुरसाक हीच बायल ज्युस्त आसा, धडो शिकोवपाक.
विचार केल्यार कळून येता, आदर्श बायलेच्यो संकल्पना सांगपी हो मनीस खरें तर बाबडो आपलें दुखणें लिपोवपाचो, दुबळें लिपोवपाचो यत्न करता. हा हा हा
पुरूशप्रधान ही एक समाजीक वेवस्था आसून तातूंत दादले हेरांचेर वर्चस्व गाजयतात, पूण खास करून बायलांचेर वर्चस्वाचोय संदर्भ दिवंक शकता; तशेंच तो विंगड विंगड प्रकटीकरणां मेरेन पावूंक शकता, जातूंत दादल्यांक हेरां वयल्यान समाजीक विशेशाधिकार आशिल्ल्यान शोशण वा जुलूम जाता, जशें नैतीक अधिकार आनी नियंत्रणाचेर दादल्यांच्या वर्चस्वाच्या माध्यमांतल्यान असमानता निर्माण जाता.
गार्गी सातोस्कार
9511638054
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
