भांगरभूंय | प्रतिनिधी
मडगांव, प्रतिनिधी : सनबर्न आनी ड्रग्साचो संबंद लावन सगळे कडेन सनबर्न फेस्टिवलाक विरोध करप सुरु आसा. मात म्हज्या मतान ड्रग्स सगळेच कडेन उपलब्ध आसात. ताका लागून गोंयांत सनबर्नचें आयोजन करपाची गरज आसाच अशें ना. ड्रग्स पसून तरणाटे पिळगेक पयस दवरपाची आनी ड्रग्स विक्री आनी विकत घेवपाचे वेव्हार जाता जाल्यार ताची म्हायती पुलिसांक दिवप ही आमची सगळ्यांची जापसालदारकी जावन आसा, अशें मंत्री आलेक्स सिक्वेरा हांणी सांगलें.
मडगांव जिल्लोधिकारी कार्यालयांतले स्वातंत्र्य दिसाचे कार्यावळी उपरांत मंत्री आलेक्स सिक्वेरा हांणी सगळ्यांनी एकवटान ड्रग्स विरोधी लढाय लढपाची गरज आसा अशें मत उक्तायलें. सनबर्न आनी ड्रग्साचो संबंद आतां सांगतात. मात हांव आमदार आसतना जायते जाण पास मागताले. पालक सध्या आपल्या भुरग्याच्या फुडारा खातीर कितेंय करपाक तयार आसतात. ताका लागून पालकांनीय आपल्या भुरग्यांक ड्रग्सां पसून पयस दवरपाचें कर्तव्य पाळपाची गरज आसा. लोटले पंचायतीचे खास ग्रामसभेंत सनबर्न आड थाराव घेतलो. आपल्याक ते ग्रामसभे विशीं कोणेंच कळोवंक नाशिल्लें. ग्रामसभेंत जरी थाराव घेतलो तरी लोटले सनबर्न आयोजनाचो कसलोच प्रस्ताव येवंक ना, फकत भंय बाळगिल्ल्यान तशी कृती जाल्या. आपूण लोकांच्यो भावना जाणून घेवन राज्य सरकाराक कळयतलों. हें आपलें कर्तव्य, अशें मंत्री आलेक्स सिक्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
